Të akuzuarit për pjesëmarrje në vrasjen e Liridona Ademajt janë sjellë sot në gjykatë, ku pritet të mbahet seanca e fundit e këtij rasti.
Gjatë kësaj seance, pritet që palët të paraqesin fjalët përfundimtare, duke i hapur rrugë vendimit përfundimtar të gjykatës.
Në këtë rast janë të akuzuar Naim Murseli, Granit Plava dhe Kushtrim Kokalla.
Në seancën paraprake, e cila u mbajt së fundmi, u parashtruan pyetje lidhur me jetën private të të akuzuarve dhe u shpall i mbyllur shqyrtimi gjyqësor.
Sipas aktakuzës, tre të akuzuarit ishin marrë vesh paraprakisht për kryerjen e vrasjes, ku Granit Plava dyshohet se e ka kryer aktin, ndërsa Naim Murseli kishte marrë përsipër t’i paguante atij shumën prej 30 mijë eurosh.
Prokuroria pretendon se i gjithë plani ishte organizuar nga bashkëshorti i viktimës, Naim Murseli, si pasojë e problemeve në raportet familjare dhe martesore, që sipas aktakuzës çuan në motivin e hakmarrjes.
Tutje, në aktakuzë thuhet se fillimisht Murseli ia kishte shpalosur planin Kushtrim Kokallës, i cili kishte refuzuar të ndihmonte drejtpërdrejt në realizimin e vrasjes.
Megjithatë, ai më pas kishte ndërmjetësuar duke e vënë në kontakt Murselin me Granit Plavën.
Po ashtu, sipas dosjes së prokurorisë, arma me të cilën dyshohet se është kryer vrasja ishte siguruar nga Naim Murseli përmes Tom Dodajt, për shumën prej 280 eurosh, bashkë me 20 fishekë.
Në seancën fillestare më 31 janar 2025, Murseli është deklaruar i pafajshëm.
Plava nuk është deklaruar rreth fajësisë, ndërsa Kokalla ka kërkuar kohë për t’u konsultuar me mbrojtjen./teve1.info/
