Sigal Prishtina është kthyer te fitorja në elitën e basketbollit kosovar, pas dy humbjeve rresht, nga Peja dhe Vëllaznimi. Sigal Prishtina të dielën në mbrëmje e fitoi ndeshjen e xhiros së tetë ndaj Proton Cable Prizreni.
Ballafaqimi i zhvilluar në “Pallatin e Sportit” në Prishtinë, i takoi “bardhekaltërve” që triumfuan me rezultatin 109:91.
Çereku i parë u mbyll baras, ndërsa periudhën e dytë, prizrenasit e fituan me një pikë epërsi, 24:23. Por pas pushimit, “bardhekaltrit” shfaqën më shumë dhe dominuan deri në fund të ballafaqimit.
Me 12 pikë epërsi e fituan dhjetëminutëshin e tretë, 32:20, kurse çerekun e fundit e mbyllën me rezultatin 28:21, për të triumfuar me 18 pikë epërsi.
Shaheed Davis ishte më i miri te Prishtina me 22 pikë, 10 kërcime e tri asistime, kurse kontribut në fitore dha edhe Derrick Wilson me 16 pikë, shtatë kërcime e tetë asistime. Dardan Berisha pati 18 pikë, gjashtë kërcime e katër asistime.
Ty Cockfield me 22 pikë, 8 kërcime e katër asistime dhe Desi Sills me 18 pikë, 10 kërcime e pesë asistime, patën paraqitjen më të mirë te prizrenasit.
Sigal Prishtina e realizoi fitoren e pestë të edicionit aktual, ndërsa ka edhe tri disfata. Për Proton Cable Prizrenin ishte disfata e gjashtë dhe është në vendin e parafundit në tabelë. Ka edhe dy fitore.