Qendra Kombëtare për Menaxhim Kufitar ka njoftuar se magjistralja në Rashkë, që shpie drejt pikëkalimit kufitar në Jarinjë, është bllokuar përkohësisht të martën nga disa qytetarë serbë.
Sipas njoftimit, gjatë kohës së bllokadës qarkullimi i automjeteve në hyrje të Republikës së Kosovës ishte pothuajse i ndërprerë, dhe u raportua se asnjë automjet apo kamion nuk po hynte në territorin e Kosovës, përveç atyre që kalonin nga Novi Pazari.
“Kemi informata nga qytetarë se magjistralja në Rashkë drejt Jarinjës është e bllokuar. Qarkullimi në hyrje të RKS është shumë i vogël, dhe për momentin nuk ka asnjë kamion apo automjet në hyrje,” u tha në njoftimin fillestar të QKMK-së.
Mirëpo, brenda pak minutash Qendra ka njoftuar se rruga është zhbllokuar dhe është liruar për qarkullim të rregullt.
“Ju njoftojmë se sipas informatave, rruga që shpie nga magjistralja e Rashkës për në PKK Jarinjë është zhbllokuar dhe e hapur për qarkullim,” thuhet në njoftimin e dytë.
Ndërkohë, më herët gjatë ditës, QKMK kishte informuar edhe për një bllokadë tjetër në rrugën që shpie në pikëkalimin kufitar në Merdar, e cila u vendos nga qytetarë serbë rreth orës 18:00. Edhe kjo rrugë u rihap brenda një ore, sipas autoriteteve.
Qendra Kombëtare për Menaxhim Kufitar apelon për kujdes gjatë planifikimit të udhëtimeve, dhe për ndjekje të njoftimeve të rregullta zyrtare për gjendjen në pikat kufitare.
