Fundori Arian Azemi është përforcimi i parë i Sigal Prishtinës për sezonin 2025/26 në elitën e basketbollit kosovar.
Azemi, të martën është zyrtarizuar te Sigal Prishtina, ekip me të cilin ka firmosur kontratë për sezonin e ri që starton në muajin shtator.
Në dy sezonet e fundit, Azemi ka qenë pjesë e basketbollit kosovar, ku ka treguar paraqitje të mira me fanellën e Istogut dhe Vëllaznimit të Gjakovës.
Sezonin e fundit, Azemi ishte ndër më të dalluarit te Vëllaznimi, ekip me të cilin triumfoi në Ligën Unike dhe ku luajti me një mesatare prej 9 pikëve, 4 kërcimeve dhe po aq asistimeve.
Sigal Prishtina ka paralajmëruar rikthim të fuqishëm në sezonin e ri, pasi para Azemit e ka prezantuar trajnerin e mirënjohur, grekun Michalis Kakiouzis, i cili do ta udhëheq ekipin drejt sukseseve.
