Një thirrje emergjente për zjarr bëri që të vihen në aksion menjëherë.
Zjarrfikësit e Deçanit morën rrugë drejt Bjeshkëve, për të shuar zjarrin që e kishte kapluar atë pjesë.
Por flakët e shpërndara e bënë të pamundur shuarjen e tij të shtunën.
Prandaj pas mesnate, kryetari Bashkim Ramosaj bëri një thirrje për ndihmë. PAMJE STATUSI
E nga mëngjesi i së dielës, ekipi prej 35 personave me zjarrfikës e vullnetarë patën angazhim të plotë.
Përkundër punës së tyre, lokalizimi i zjarrit ishte i vështirë.
“Sot në mëngjes jemi mobilizu të gjithë zjarrfikësit, përpos asaj kemi pasë mbështetjen e zjarrfikësve të Junikut, kemi pasë përkrahjen e shumë vullnetarëve të cilët kanë shku dhe na kanë mbështetë në këtë operacion. Është shpërnda zjarri, ka qenë një zjarr masiv, pra teren i hapur, ka qenë shumë vështirë me lokalizu zjarrin”, ka thwnw Besim Selmanaj, komandant i zjarrfikësve në Deçan.
Ndonëse operacioni kaloi me sukses, zjarret shkaktuan dëme të mëdha.
Në pjesën publike të quajtur “Çeli” u dogjën plot 30 hektarë.
“Është krejt pronë publike, është brez i gështenjës mandej kufizohet me brezin e rrahishtës që i themi ne, e që është keq pse ka ndodhë”, tha kryetari i kësaj komune Bashkim Ramosaj.
Ai thotë se zjarri është shkaktuar qëllimisht, prandaj ka një thirrje për qytetarët.
“Është zjarr i vendosur prej ndonjë njeriut, prej pakujdesisë, dikush që shkon me bo piknik ose që shkon me bo shëtitje. Një pakujdesi e vogël dhe na nxjerr tërë këtë problem gjithë neve. Shpresoj mos me pasë këso situatash në të ardhmen edhe me pasë kujdes”, shprehet Ramosaj.
Përveç Deçanit, Agjencia për Menaxhimin Emergjent tregoi gjatë ditës se kohëve të fundit është vërejtur një shtim i zjarreve.
Agjencia apelon për kujdes të shtuar nga të gjithë qytetarët, duke shmangur ndezjen e zjarreve në natyrë dhe duke raportuar çdo rast të dyshimtë.
