Më 17 shkurt 2008, ëndrra e shumë shqiptarëve u bë realitet.
Në atë datë Kosova shpalli përfundimisht pavarësinë e saj nga Serbia.
Me mijëra qytetarë mbushën sheshin e Prishtinës, duke festuar pavarësinë e vendit
Por, një atmosferë krejtësisht tjetër mbizotëronte në Serbi.
Shumë qytetarë serbë ishin mbledhur në Beograd, duke protestuar kundër pavarësisë së Kosovës.
Gazetari nga Beogradi, Rade Radovanoviq, rrëfen detaje interesante se si u prit pavarësia e Kosovës në Serbi.
Ai tregon edhe për veprimet e fundit që po bënin krerët shtetërorë serbë atë ditë.
“Ishte një surprize e madhe kur u shpall pavarësia e Kosovës për shumë njerëz në Beograd. Presidenti i atëhershëm i Serbisë, Boris Tadiç, jo rastësisht një ditë para se të shpallej pavarësia, udhëtoi për në Rumani. Ndërsa Vojislav Koshtunica me anëtare tjerë të qeverisë, mbanin takime të gjata. Kostunica se bashku me liderët kishtar janë lutur për një Serbi te madhe dhe gjithmonë e kanë menduar Serbinë më krahinën e vet jugore. Ndërsa në Beograd ishin organizuar protesta nga grupe të ndryshme nacionaliste, përfshirë edhe shërbimet sekrete. Të rinjtë nacionalist sulmuan ambasadën amerikane dhe demoluan objekte të tjera, dhe si pasojë e këtyre protestave një i ri e humbi jetën. Mund të them që ka pasur reagime të egra spontane. Të ashtuquajturit të rinjtë e revoltuar kanë shkaktuar dëme të mëdha atë ditë” , tregon për Tëvë1 gazetari Radovanoviq.
Radovanoviq, thotë se në ditën kur Kosova shpalli pavarësinë, ai ndodhej ne Kopaonik së bashku me gruan e tij.
Nga atje, ai e bëri edhe një telefonatë.
“Më kujtohet shumë mirë 17 shkurti, kur Kosova e shpalli pavarësinë. Atë ditë isha në Kopaonik së bashku me gruan time për të skijuar. Me kujtohet një moment, i kam thane gruas, po e marr telefonin sepse me duhet t’ia uroj dikujt pavarësinë. E kam thirrur Enver Petrovcin, aktorin e njohur, dhe më është lajmëruar grua e tij profesoresha Valbona. I thash të mos jete askush nga Serbia që nuk ua ka uruar pavarësinë e Kosovës”, thotë ai.
Radovaniq shpreson që Kosova dhe Serbia do t’i normalizojnë marrëdhëniet në të ardhmen e afërt, dhe qytetarët e të dyja vendeve do të sillen në mënyrë racionale.
“Shpresoj shumë që raportet mes Kosovës dhe Serbisë do të normalizohen në një të ardhme të afërt. Dëshiroj qe njerëzit në Kosove dhe në Serbi, te jenë sa me afër Evropës, le te jetojnë një jetë normale dhe le ta vizitojnë njeri-tjetrin. Gjeneratat e reja duhet të mësojnë nga e kaluara tragjike në mënyrë që sot të sillemi si njerëz racional. Uroj që Kosova gjithmonë do të jetë një shtet normal sikurse shtetet e tjera”, shprehet gazetari nga Begoradi
Serbia edhe sot e kësaj dite vazhdon ta mohojë dhe ta luftojë pavarësinë e Kosovës.
