Kreu i AAK-së, Ramush Haradinaj ka kritikuar qeverisjen e Albin Kurti, duke thënë se ai nuk përfaqëson më shpresë për qytetarët, por një bilanc të dobët të udhëheqjes së tij.
Sipas Haradinajt, që nga viti 2019, Kurti ka kërkuar besimin e qytetarëve në emër të ndryshimit, por sot ai duhet të gjykohet mbi rezultatet konkrete të qeverisjes.
Ai vlerëson se Kosova nuk është bërë më stabile, më funksionale dhe as më e fortë gjatë kësaj periudhe.
Haradinaj thekson se vendi është përballur me kriza të njëpasnjëshme, bllokada institucionale dhe tensione të vazhdueshme politike, të cilat, sipas tij, janë kthyer në mënyrë qeverisjeje.
Ai shton se përplasjet e fundit institucionale tregojnë se problemi qëndron te modeli i udhëheqjes së Kurtit.
Në aspektin ekonomik, ai thekson se qytetarët po përballen me rritje të çmimeve dhe vështirësi në jetesë. Sipas tij, ndihmat financiare nuk mund të zëvendësojnë zhvillimin ekonomik dhe reformat e mirëfillta.
Haradinaj u bën thirrje edhe pjesëtarëve të diasporës që të vlerësojnë realisht gjendjen në vend, duke theksuar se Kosova ka nevojë për institucione funksionale, stabilitet dhe një ekonomi që krijon mundësi reale për qytetarët.
Në fund, ai thekson se edhe një fitore e mundshme e Kurtit nuk garanton stabilitet, pasi, sipas tij, modeli aktual i qeverisjes prodhon vazhdimisht kriza dhe përplasje./teve1.info/
