Dhurimin e gjakut nuk e ka për herën e parë.
Por, këtë herë, Bekë Maloku nga Prishtinë, thotë se këtë veprim po e bën nga dëshira e jo nga nevoja.
“Kam dhuruar edhe herëve tjera por me keqardhje herëve tjera kom dhurua kur iu ka dashtë dikujt, kurse këtë herë po dhuroj për shkak se mo nuk do pres vetëm kur i nevojitet dikujt por do dhuroj edhe pa ju nevojit”, thotë ai.
E si Maloku, vepruan edhe shumë qytetarë të Prishtinës të dielën.
Krejt kjo në aksionin e Qendrës Kombëtare për Transfuzionin e Gjakut për Ditën Botërore të Dhurimit të Gjakut.
Por, ndryshe nga Maloku, dikush tjetër gjak po dhuron për herë të parë.
“Është hera e parë që kam dhuru gjak, tu ec në Prishtinë në shesh thash pse jo mirë është për me pshtu jetë nuk është që tmerr kohë shumë edhe bile e pshton një jetë, edhe për një punë qe e bën ti për 5 minuta mundesh me ja pshtu njërit një jetë”, shprehet Ensar Islami -qytetar.
E një tjetër qytetar, thotë se kësaj thirrje i përgjigjet rregullisht.
“Ka mbi 10 herë që kam dhuru, është një kohë e gjatë që dhuroj por jo rregullisht vetëm herë pas here. Arsyeja është humane, për shpëtimin e jetëve të njerëzve kush ka nevojë por edhe për shëndetin tim sigurisht”, shprehet Nexhat Vllasaliu.
Por, cili është qëllimi i krejt këtij aksioni për dhurimin vullnetar të gjakut?
“Qëllimi i 14 qershorit është falënderimi për të gjithë dhuruesit e gjakut të cilët me dhurimin e gjakut i bashkohen thirrjes për shpëtimin e jetëve çdo ditë, pastaj është ne kuadër të ndërgjegjësimit dhe sensibilizimit për rëndësinë e dhurimit të gjakut si dhe inkurajimin edhe qytetarët e rinj që te i bashkohen kësaj dite për dhurim të gjakut”, shprehet Albana Bislimi- Krasnqi, doktoreshë.
E nga kjo qendër, thonë se edhe këtë 14 qershor, qytetarët iu përgjigjen ftesës.
“Ftesës për dhurim vullnetar të gjakut, na u kanë përgjigjur një numër i konsiderueshëm i dhuruesve të gjakut, këto ditë e vikendit është pak ma qetë mirëpo po vazhdon si dhurues të rregullt, mirëpo kemi edhe dhurues të rinj që i bashkëngjiten këtij misioni edhe synimi ynë është që këta dhurues të vazhdojnë të kthehen në dhurues të rregullt”, thotw ajo.
Ndryshe, Qendra Kombëtare për Transfuzionin e Gjakut nga 11 qershori ka vendosur tendën për dhurimin e gjakut në sheshin “Nënë Tereza” në Prishtinë dhe do të jetë e hapur deri me datën 18 qershor në ora 18:00.
E përveç Prishtinës, qytetaret mund të dhurojnë gjak edhe në Qendren Kombëtare të Kosovës si dhe në qytetet e tjera të vendit.
