Është në funksion tash e dy dekada.
Mirëpo Qeveria e Kosovës ka vendosur të shuajë Agjencinë për Investime dhe Përkrahje të Ndërmarrjeve në Kosovë.
Kështu, në Kuvendin e Kosovës gjatë së mërkurës u miratua në lexim të parë Ligji për Investime të Qëndrueshme.
Me vendimin e ri, në vend të KIESA-s, do të themelohen dy agjenci të reja.
Mirëpo për shuarjen e saj dhe sistemimin e stafit, shprehet i shqetësuar deputeti nga radhët e PDK-së, Ferat Shala.
“Edhe mënyra e shuarjes së KIESA edhe mënyra e trajtimit dhe themelimit të dy agjencioneve tjera janë krejtësisht të pakuptueshme edhe ekonomikisht edhe politikisht. Unë inkurajoj të gjithë ata që ta ruajnë dinjitetin e vet profesional e njerëzor dhe juridik sepse ekziston mundësi juridike që ata t’i realizojnë të drejtat e veta dhe jam i bindur për këtë dhe ne do t’i mbështesim patjetër”, thotë Shala.
Se duhej fuqizuar edhe më shumë kjo agjenci në vend të shuarjes së saj, e thotë njohësi i ekonomisë Lavdim Hamidi.
“LVV ka vendosë me shu këtë agjencion në kohën kur investimet e huaja në Kosovë mungojnë. Nuk mbahet mend për këto dy vite qeverisje të LVV-së që ka ardh një investitor i rëndësishëm dhe ka sjellë kapitalin e vet në Kosovë. Besoj se në këtë kohë kur ka mungesë të investimeve të huaja, ish dashtë me fuqizu edhe më shumë KIESA-n”, deklaroi Hamidi.
Në vend të KIESA-s, pritet të themelohen dy agjenci të tjera: Agjencia e Investimeve dhe Eksporteve dhe Agjencia për Përkrahjen e Ndërmarrjeve. E para parashihet t’i përgjigjet Zyrës së Kryeministrit, ndërsa e dyta- Ministrisë së Industrisë dhe Tregtisë.
Në këtë agjenci aktualisht janë të punësuar 23 zyrtarë publikë.
Kronika e realizuar nga gazetarja Albiona Hajdari