NPH “Ibër-Lepenc” Sh.A. ka reaguar ndaj raportimeve së fundmi në disa media, të cilat i ka cilësuar si të pabazuara dhe dezinformuese, lidhur me konkursin për pozitën e Kryeshefit Ekzekutiv të kësaj ndërmarrjeje publike.
Sipas sqarimit zyrtar, konkursi për këtë pozitë është shpallur më 21 shtator 2022, në përputhje të plotë me legjislacionin në fuqi për ndërmarrjet publike dhe aktet e brendshme të NPH “Ibër-Lepenc” Sh.A., ndërsa afati për aplikim ka qenë deri më 21 tetor 2022.
Në kuadër të procesit të përzgjedhjes, nga gjithsej 27 kandidatë të futur në listën e ngushtë, 25 kanë marrë pjesë në intervistim. Intervistat janë zhvilluar më 10, 11 dhe 14 nëntor 2022, ndërsa rezultatet janë publikuar më 24 nëntor 2022.
Në njoftimin për media thuhet se bazuar në vlerësimin dhe poentimin e bërë nga gjashtë anëtarët e panelit intervistues, kandidatët me më së shumti pikë kanë qenë:
L.H. – 65 pikë
Faruk Mujka – 60 pikë
Xh.B. – 60 pikë
V.S. – 59 pikë
B.H. – 58 pikë.
Pas publikimit të rezultateve, kandidati i renditur i pari, L.H., ka tërhequr aplikacionin e tij nga procesi i mëtejmë i përzgjedhjes.
Në këto rrethana, Bordi i Drejtorëve, në mbledhjen e mbajtur më 1 dhjetor 2022, thotë se ka shqyrtuar kandidatët e mbetur dhe ka vlerësuar se ata përmbushnin kriteret për pozitën.
Megjithatë, sipas njoftimit, Faruk Mujka është vlerësuar se ka pasur përparësi të caktuara, përfshirë profesionin si inxhinier i ndërtimtarisë dhe përvojën paraprake në rajonin e Mitrovicës, veçanërisht në pjesën veriore.
Në përfundim, nga NPH “Ibër-Lepenc” Sh.A. thuhet se i gjithë procesi i konkursit dhe përzgjedhjes është zhvilluar në mënyrë të rregullt, transparente dhe në përputhje të plotë me legjislacionin në fuqi, duke mohuar çdo pretendim për ndërhyrje apo parregullsi.
“Çdo pretendim që synon të paraqesë të kundërtën është i pabazuar dhe dezinformues”, thuhet në reagim.
