Një proces gjyqësor federal nis të hënën që sfidon një fushatë të administratës Trump për arrestimin dhe deportimin e pedagogëve dhe studentëve që kanë marrë pjesë në protesta pro-palestineze dhe aktivitete të tjera politike.
Padia, e ngritur nga disa organizata universitare kundër presidentit amerikan, Donald Trump dhe anëtarëve të administratës së tij, do të jetë një nga të parat që arrin në fazën e gjyqit, raporton AP.
Paditësit kërkojnë që gjykatësi i distriktit amerikan, William Young, të vendosë se kjo politikë shkel të Drejtën e Amendamentit të Parë për lirinë e shprehjes dhe Aktin e Procedurës Administrative, i cili rregullon mënyrën se si agjencitë federale nxjerrin dhe zbatojnë rregullore.
Në dokumentet para-gjyqësore, paditësit theksojnë se “Efektet e kësaj politike janë ndjerë menjëherë. Studentët dhe pedagogët që nuk janë shtetas në të gjithë SHBA-të janë frikësuar dhe kanë heshtur.”
Ata shtojnë se “Studentët dhe pedagogët po shmangin protestat politike, po fshijnë postimet në rrjetet sociale dhe po tërhiqen nga angazhimi me grupe që mbështesin kauzën palestineze.”
Për më tepër, “ata po i vetëcensurojnë diskutimet e tyre publike, madje edhe në klasë.”
Disa studiues pritet të dëshmojnë se politika dhe arrestimet kanë detyruar ata të largohen nga aktivizmi për të drejtat e palestinezëve dhe nga kritikat ndaj politikave të qeverisë izraelite.
Që nga fillimi i administratës Trump, qeveria amerikane ka përdorur ligjet e imigracionit për të ndjekur studentë dhe studiues ndërkombëtarë në universitete amerikane.
Trump dhe zyrtarë të tjerë kanë akuzuar protestuesit dhe aktivistët si “pro-Hamas”. Megjithatë, shumë protestues thonë se po kundërshtonin veprimet ushtarake të Izraelit.
Paditësit përmendin emra të njohur aktivistësh, përfshirë Mahmoud Khalil, një aktivist palestinez dhe i diplomuar në Universitetin e Kolumbias, i cili u lirua muajin e kaluar pas 104 ditësh paraburgimi federal për çështje imigracioni.
Khalil është bërë simbol i shtypjes së protestave në kampuset universitare nga ana e administratës Trump.
