Komuna e Mitrovicës së Veriut ka shtyer aksionin për largimin e institucioneve të Serbisë nga objekti i saj në Lagjen e Boshnjakëve. Kështu tha për teve1.info kryetari i kësaj komune, Erden Atiq.
Zyra për Kosovën e Qeverisë së Serbisë, Drejtoria e Fondit të Sigurimit Pensional dhe Invalidor, Qarku Administrativ i Mitrovicës së Kosovës dhe Qendra për Punë Sociale nga Vushtrria gjenden në atë objekt prej kohësh.
Më 22 gusht, inspektorati komunal kërkoi prej tyre që, brenda tri ditësh, ta lirojnë objektin, për shkak se nuk dorëzuan dokumente apo kontrata për shfrytëzimin e tij.
Kurse, Qeveria e Kosovës nuk deshi ta komentojë këtë vendim të Komunës së Mitrovicës së Veriut, me arsyetimin se bëhet fjalë për “çështje lokale”.
E ky vendim i autoriteteve lokale në Mitrovicën e Veriut, ngjalli reagimin e Shteteve të Bashkuara të Amerikës dhe Bashkimit Evropian.
Në një reagim të Ambasadës Amerikane në Kosovës, thuhet se vendimet e tilla mund të qojnë në tensionim të situatës në veri.
Teksa reagim të ngjashëm për këtë rast ka pasur edhe Bashkimi Evropian. Në një përgjigje për teve1, zëdhënësi i BE-së, Peter Stano, tha se ky vendim bjen në kundërshtim me përpjekjet për deeskalim mes Kosovës dhe Serbisë./teve1.info./
