Është fushë futbolli, ani pse nuk ngjan si e tillë.
I gjithë oborri i shkollës fillore “Lasgush Poradeci” në fshatin Vonjovc të komunës së Shtimes, ishte i mbushur me ujë.
Si pasojë e të reshurave të mëdha të shiut, dita nuk nisi zakonshëm.
Falë angazhimit të personelit shkollor dhe instutucioneve lokale, gjendja u sanua dhe procesi mësimor vijoi për sesionin e pasdites.
Të reshurat e 48 orëve të fundit, shkaktuan telashe edhe nëpër shtëpi e oborre të banorëve të fshatit Vonjovc të Shtimes.
Dëmet përfshijnë kryesisht sektorin e amvisërisë.
Por, kjo situatëm banorët e kësaj zone tregojnë se nuk po u ndodhë për herë të parë.
E për këtë arsye, ata u shprehën të zhgënjyer me punën dhe reagimin e nivelit lokal e qendror.
Në anën tjetër, komuna e Shtimes thotë se gjatë tërë kohës janë në teren, e sidomos në zonat më të prekura nga këto vërshime.
“Ekipet emergjente, gjatë ditës së djeshme dhe sot, kanë qenë në terren duke monitoruar situatën dhe duke ndërmarrë veprimet e nevojshme për parandalimin e çdo rreziku të mundshëm. Dëmet, sipas vlerësimeve fillestare, duket se janë kryesisht në sektorin e bujqësisë. Megjithatë, ende nuk kemi një pasqyrë të plotë deri në përfundimin e vlerësimit nga komisioni komunal, i cili po vepron bazuar në kërkesat e qytetarëve të adresuara”, ka thënë Rushiti.
Sipas komunës, vërshimet kanë mundur të jenë më të mëdha, por që kjo u evitua falë punimeve për rregullimin dhe pastrimin e shtratit të lumit.
