Në kuadër të një hetimi që Prokuroria Speciale e Republikës së Kosovës po zhvillon lidhur me shpronësimet e dyshuara të kundërligjshme, të mërkurën më 6 maj është realizuar një operacion i gjerë policor në disa komuna të vendit, përfshirë Pristinën, Lipjanin dhe Vushtrrin.
Sipas njoftimit zyrtar, operacioni është zhvilluar në bashkëpunim mes Prokurorisë Speciale dhe Policisë së Kosovës, ku si rezultat janë arrestuar gjithsej shtatë persona.
Të arrestuarit dyshohen për vepra të ndryshme penale, përfshirë “Dhënien e ryshfetit”, “Marrjen e ryshfetit”, “Keqpërdorimin e pozitës apo autoritetit zyrtar”, si dhe “Ndihmë në kryerjen e veprës penale – dhënie dhe marrje ryshfeti”.
Sipas njoftimit, në mesin e të dyshuarve janë identifikuar personat me inicialet V.G., N.R., N.K., A.P., H.M. dhe Sh.S.
Gjatë zbatimit të urdhër kontrollit, autoritetet kanë sekuestruar pajisje elektronike, dokumentacion të ndryshëm dhe para të gatshme në vlerë prej 6 mijë e 450 eurosh.
Ky rast lidhet me një hetim më të gjerë për shpronësime të dyshuara të kundërligjshme, ndërsa në dhjetor të vitit të kaluar në të njëjtën çështje ishin arrestuar edhe shtatë persona të tjerë./teve1.info/
