Pak më parë për televizionin Tëvë1, nëna e Elvis Hasanit, një fëmijë 10-vjeçar nga komuniteti ashkali i cili më 10 gusht u godit nga një veturë në Bresje të Fushë Kosovës, ka bërë apel për ndihmë për sigurimin e medikamenteve të nevojshme për shërimin e djalit të saj.
“Krejt infuzionat po duhet me i ble vet, pare s’po ka, veç qka po i ndihmojnë kështu”, ka thënë ajo, duke treguar vështirësitë financiare me të cilat po përballet familja.
Ndërkohë, qytetarja Dafina Krasniqi në një postim në Facebook ka ngritur alarmin për gjendjen shëndetësore të 10-vjeçarit, duke kritikuar mungesën e reagimit nga institucionet.
“Familja poashtu nuk ka marrë ASNJË informatë përditësuese për procesin e hetimit lidhur me personin që e ka goditur dhe është larguar pa ofruar ndihmë Elvisit”, ka shkruar ajo, duke shtuar se është dëshmitare e “dështimeve të vazhdueshme për të treguar respekt e ndjeshmëri për trajtim dinjitoz të aksidentit dhe shërimit të Elvisit”.
Pas këtyre reagimeve, Shërbimi Spitalor Klinik Universitar i Kosovës (SHSKUK) ka lëshuar një komunikatë, duke theksuar se pacienti ka qenë gjatë gjithë kohës nën kujdesin e stafit mjekësor.
“Pacienti ka qenë nën mbikëqyrje të vazhdueshme të stafit mjekësor dhe infermieror, duke marrë trajtimin e nevojshëm sipas protokolleve mjekësore”, thuhet në njoftimin e SHSKUK.
Sipas tyre, Elvisi fillimisht është trajtuar në Njësinë e Kujdesit Intensiv Pediatrik për 17 ditë, ku ka marrë terapi të shumta dhe monitorim të vazhdueshëm, ndërsa më 27 gusht është transferuar në Repartin e Neurologjisë Pediatrike, në gjendje stabile.
“Klinika e Pediatrisë njofton opinionin publik dhe familjarët se fëmijës nuk i ka munguar asnjëherë kujdesi mjekësor, dhe mbetet nën përkujdesjen e pandërprerë të profesionistëve shëndetësorë të QKUK-së”, përfundon reagimi i SHSKUK.
