Me pankarta në duar dhe me flamuj kuq e zi, emigrantët shqiptarë i janë bashkuar tubimit në qendër të Londrës në “Westminster Bridge”, ku kërkojnë shkarkimin nga detyra të sekretares së Brendshme dhe të kërkohet falje publike nga qeveria.
Ata shprehen se ndjehen të fyer nga deklarata e Braverman ndërsa theksojnë se nuk janë kriminelë por taksapagues dhe kontribues në shoqërinë britanike.
Përveç atyre që jetojnë në Britani, në mbështetje kanë mbërritur edhe shqiptarë të tjerë nga Zvicra që i bashkohen kërkesave të tyre për deklaratat e sekretares britanike. Në rast se nuk ka reagim për protestën e tyre, emigrantët paralajmërojnë protestë tjetër më 28 nëntor, Dita e Flamurit.
Debatet dhe gjuha e përdorur nga Sekretarja e Brendshme Suella Braverman se Britania ndodhet përballë një pushtimi azilkërkuesish shqiptarë dhe se ato duhet të dëboheshin, ka nxitur debate mes dy shteteve. Më herët kryemnistri Edi Rama theksoi se nuk mund ta toleronte reagimin e Braverman, të cilin e konsideroi ‘të çmendur’ dhe një sjellje që ushqen ksenofobinë. “Shqipëria është ende në pritje të një kërkese faljeje nga qeveria e Mbretërisë së Bashkuar”ka theksuar lidhur me çështjen kryeministri Rama./RTSH/
