22:47 Shqipëria shokohet në fund nga Islanda
Shqipëria ka pësuar gol në fund të ndeshjes ndaj Islandës. Dhe, kështu ka humbur mundësinë ta mbyllë edicionin e tretë të Ligës së Kombeve në vendin e dytë në grupin 2 të Ligës B. Ndeshja e luajtur në Tiranë në mes të Shqipërisë dhe Islandës përfundoi me rezultatin 1:1.
Shqipëria golin e barazimit e pësoi në fund të takimit të luajtur të martën mbrëma. Shqipëria avancoi e para me golin e Ermir Lenjanit në minutën e 35-të, por Islanda ndonëse me një lojtar më pak në fushë që nga minuta e 10-të, në minutën e 90-të shënoi golin e barazimit.
Mikael Anderson shënoi nga afërsia golin e barazimit. Izraeli avancoi në Ligën A si i pari me tetë pikë, ndërsa Shqipëria mbeti në vendin e tretë me dy pikë. Me katër pikë në vendin e dytë përfundoi Islanda.
21:39 Shqipëria shkon në pushim me epërsi ndaj Islandës
Shqipëria e ka mbyllur me epërsi minimale pjesën e parë ndaj Islandës. Golin e vetëm e ka shënuar Ermir Lenjani në minutën e 35-të të ndeshjes që po luhet në “Air Albania” në Tiranë.
Ky takim është i vlefshëm për grupin e dytë të Ligës B të Ligës së Kombeve.
Me fitore eventuale, Shqipëria do të përfundojë në vendin e dytë.
21:23 Shqipëria në epërsi ndaj Islandës
Shqipëria ka kaluar në epërsi ndaj Islandës. Ermir Lenjani shënoi golin e epërsisë së parë të Shqipërisë.
Ai shënoi në minutën e 36-të. Islanda po luan nga minuta e 10-të me një lojtar më pak në fushë.
19:26 Formacionet zyrtare/ Shqipëria me shumë ndryshime në sfidën me Islandën
Shqipëria përballet me Islandën në sfidën e fundit në grupit në Ligën e Kombeve, aty ku do të kërkojë fitoren për të mbajtur gjallë shpresat për një rrugë drejt Europianit, pikërisht nëpërmjet këtij kompeticioni.
Trajneri Reja ka bërë disa ndryshime krahasuar me sfidën e tri ditëve më parë në Izrael, teksa Sokol Cikalleshi luan me shiritin e kapitenit në krah të Uzunit në sulm, ndërsa Lenjani merr vendin e Hysajt në të majtë, në rreshtimin 3-5-2.
Formacioni i Shqipërisë: Strakosha, Balliu, Ismajli, Veseli, Lenjani, Ramadani, Gjasula, Abrashi, Uzuni, Cikalleshi, Bajrami.
