Në Pallatin e Brigadave në Tiranë u mbajt samiti i “Planit të Rritjes” ku morën pjesë të gjithë liderët e Ballkanit Perëndimor dhe komisionerja për zgjerim e Bashkimit Evropian, Marta Kos.
Kur Rama po priste mysafirët e tij nga vendet fqinje, gazetarët iu drejtuan me disa pyetje.
Kryeministri Rama refuzoi të tregoj se si i ka raportet me homologun e tij nga Kosova, Albin Kurtin.
Me ardhjen e të gjithë liderëve nisën edhe punimet e Samitit.
Komisionerja për zgjerim, Marta Kos, e bëri të qartë se vendet e Ballkanit Perëndimor e kanë vendin në BE, ndërsa e veçoi Shqipërinë për progresin e shpejtë.
Ndërkaq, duke folur për planin e rritjes, ka përmendur se dy shtete ende nuk e kanë nisur procesin e reformave, që bëhet fjalë për Kosovën dhe Bosnje Hercegovinën.
Rama dhe Kos në fund iu drejtuan gazetarëve nëpërmjet një konference të përbashkët.
Kryeminstri shqiptar e konsideroi takimin si shumë të frytshëm dhe që sipas tij e afron edhe më shumë rajonin me BE-në.
Kurse diplomatja evropiane,Marta Kos, tregoi se në qershor mbaron afati për zbatimin e disa reformave që janë vendosur si kusht në rrugën për integrimit.
Tutje ajo tha se nuk duhet të krijohen hendeqe në Ballkanin Perëndimor në rrugën e integrimit.
“Dua të mbështesim jo vetëm ecurinë e Shqipërisë në BE, por ndjej dhe angazhimin tuaj. Sot kemi pasur bashkëbisedim se si ta bëjmë të suksesshme këtë rrugë. Është e vërtetë se zgjerimi është më shumë se sa zgjerim. Javën e shkuar Kolegji miratoi mburojën e strategjisë, ku qytetarët e BE të trajtohen të barabartë. Duam që BE të bëhet realitet i prekshëm në vendet tuaja. Në disa fusha po merr formë. Shqiptarët, malazezët dhe maqedonasit e veriut përfitojnë transaksione nga SEPA. Duhet të ecim në sinkron dhe mos të krijohen hendeqe mes jush. Të gjithë vendet e Ballkanit Perëndimor duhet të behën anëtarë me të drejta të plota në BE”, deklaroi Kos.
Në raportet e Progresit, të përpiluara nga BE-ja për të gjashtë vendet e Ballkanit Perëndimor, është theksuar se Shqipëria dhe Mali i Zi kanë bërë përparim të madh në rrugën drejt BE-së, dhe që mund të jetë i arritshëm synimi për anëtarësim në bllok deri më 2030.
