Deputetët u rikthyen sot në Kuvend pas zgjedhjeve të 11 majit, por seanca, që zgjati vetëm pak minuta, nisi me tensione dhe akuza mes opozitës dhe mazhorancës.
Gjatë debateve, opozita e cilësoi procesin zgjedhor si një “farsë elektorale” dhe denoncoi manipulimin e votës së qytetarëve.
Kreu i grupit parlamentar të PD-së, Gazment Bardhi, akuzoi kryeparlamentaren Spiropali për lidhje me krimin, gjë që solli ndërprerjen e fjalës së tij.
Më pas në foltore doli Sali Berisha, i cili e quajti procesin zgjedhor “më të turpshmin që nga rënia e komunizmit”, duke akuzuar kryeministrin Rama për lidhje me kartele droge dhe manipulim të votës së diasporës.
“Mblidhemi pas farsës elektorale më të turpshme, pas rënies së komunizmit. Kjo seancë mblidhet pasi partia e krimit me në krye Edi Ramën, zhvilloi farsën zgjedhore. Kjo seancë mblidhet pasi mobilizoi kartelet më të rrezikshme të drogës në Europë. Ju mblidheni sot këtu në një kohë kur votën e parë të diasporës, të diasporës shqiptare e manipuluat në mënyrën më të egër kur 1.6 mln shqiptareve iu shkelmuat votën, por bota e krimit. Përfaqësues të klaneve më të egra të botës, nuk mund të ishit ndryshe. U përdorin juve si lecka politike në funksion të perandorive të krimit”, tha Berisha.
Nga ana tjetër, kreu i grupit parlamentar të socialistëve, Niko Peleshi kërkoi që deputetët të punojnë me intensitet për miratimin e ligjeve të mbetura deri në fillim të korrikut.
“Pas një fushate të suksesshme për të gjithë, mbi të gjitha për vendin e shqiptarët, të punojmë për seancat e mbtura. Nuk jemi në cirk këtu. Do të kemi disa seanca intensive deri në fillim të korrikut. Të nderuar kolegë deputetë të PS, por edhe të grupeve të tjera, të punojmë me intensitet që rreth 25-30 akte të depozituara t’i miratojmë në këto seanca”, tha Peleshi.
Pas debateve, mazhoranca miratoi e vetme kalendarin e punës së Kuvendit deri në fund të sesionit legjislativ./rtsh.al/
