Ministria e Mbrojtjes në Shqipëri ka bërë bilancin e situatës së zjarreve në vend gjatë 24 orëve të fundit, ku janë raportuar 34 vatra zjarri. Pesë prej tyre mbeten aktive, ndërsa dy të tjera janë nën mbikëqyrje.
Për përballimin e situatës janë angazhuar 481 forca operacionale dhe 44 automjete zjarrfikëse. Në mbështetje të strukturave vendore janë angazhuar edhe 105 efektivë të Forcave të Armatosura, dy automjete zjarrfikëse të FA-së, tre helikopterë dhe një avion AIR TRACTOR.
Vatrat aktive janë përqendruar kryesisht në qarqet Tiranë dhe Dibër.
Në Malin e Dajtit, pas riaktivizimit të tre vatrave, vijon puna për shuarjen e tyre. Në terren janë 25 forca zjarrfikëse dhe të Agjencisë së Zonave të Mbrojtura, si dhe 20 efektivë të Forcave të Armatosura.
Në qarkun e Dibrës, aktive mbeten vatrat në Qafë të Helmës, Vajkal, Sllatinë dhe Komsi. Në Vajkal janë angazhuar 61 forca, përfshirë 30 efektivë të FA-së, ndërsa në Sllatinë operojnë 78 forca. Në Komsi janë angazhuar gjithashtu 25 efektivë të Forcave të Armatosura. Sipas autoriteteve, në këto zona nuk ka rrezik për banesat, shkruan rtsh.
Ndërkohë, në Elbasan, vatrat në Malin e Dardhës dhe Malin e Qukësit janë nën mbikëqyrje dhe nuk paraqesin rrezik për zonat e banuara.
Gjatë ditës së djeshme, ndërhyrje të konsiderueshme u kryen edhe në Tërbaç dhe Vranisht të Himarës, ku u angazhuan forca tokësore, dy helikopterë dhe një avion AIR TRACTOR. Në Xhyrë të Librazhdit ndërhyri edhe një helikopter i Forcave të Armatosura. Të dyja këto vatra janë deklaruar të fikura.
Agjencia Kombëtare e Mbrojtjes Civile vijon monitorimin e situatës në të gjithë territorin e vendit, në koordinim me prefekturat, bashkitë dhe strukturat e Mbrojtjes Civile.
Autoritetet bëjnë me dije se kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës së qytetarëve, banesave dhe pasurisë së tyre.
