Gjykata Themelore në Prishtinë ka pranuar marrëveshjen për pranim të fajësisë ndërmjet Igor Popoviq dhe Prokurorisë Speciale të Kosovës, në seancën e mbajtur të premten paradite.
Prokurorja Speciale Fikrije Zejnullahu, gjatë seancës, deklaroi se nga marrëveshja e arritur, i është propozuar gjykatës që ndaj Popoviqit të shqiptohet dënimi sipas përmbajtjes së saj.
“Nga marrëveshja rezulton që Gjykatës i propozojmë që t’i shqiptojë dënimin si në marrëveshje: për veprën penale të dënohet me 6 muaj burgim, dhe ky dënim t’i zëvendësohet me gjobë prej 3 mijë eurosh, si dhe dëbimi nga territori i Kosovës në afat prej dy vitesh,” tha Zejnullahu.
Popoviq ishte akuzuar për nxitje të përçarjes dhe mosdurimit ndërmjet komuniteteve etnike, pas një fjalimi të mbajtur më 18 korrik në Hoçë të Madhe të Rahovecit, ku dyshohet se ka përdorur gjuhë nxitëse kundër komuniteteve të tjera dhe Ushtrisë Çlirimtare të Kosovës.
Shpallja e aktgjykimit pritet të bëhet sot në orën 14:00.
