Sot në zyret e FFK-së, është tërhequr shorti për të përcaktuar ekipin që do të luajë në cilësi të vendasit në ndeshje të barazhit.
Shorti ka vendosur që Liria e Prizrenit të jetë vendase përballë Vushtrrisë në këtë ndeshje. Me këtë, adhuruesve të Lirisë do t’i takojë tribuna qendrore (Perëndimore), ndërsa edhe fanellat Liria pritet t’i ketë të bardhat e zakonshme. Ndërsa vushtrriasit, do të jenë përballë.
Sa i përket biletave për ndeshje, klubet nuk kanë dhënë detaje shtesë ende, ndërsa tifozëritë e të dyja skuadrave veçse kanë paralajmëruar udhëtim masiv më 21 maj në Klinë, ku në stadiumin 18 qershori takohen vendi i dytë i Ligës së Parë Grupi A dhe vendi i dytë i Ligës së Parë Grupi B.
Fituesi i kësaj ndeshje merr biletën për të luajtur “finalen” ndaj pozitës së tetë të Superligës dhe fituesi i asaj ndeshjeje (28 maj, Zahir Pajaziti, Podujevë; Fituesi i barazhit të Ligës së Parë vs. vendi i tetë i Superligës) kalon në Superligë 2022/23. Humbësi mbetet/bie në Ligë të Parë 2022/23.
