Politologu Selam Shkodra ka komentuar zhvillimet e fundit në fushatën zgjedhore, duke thënë se nga disa eksponentë politikë është tentuar të krijohet përshtypja se gara politike është shndërruar në një përballje mes presidentes Vjosa Osmani dhe kryeministrit në detyrë, Albin Kurti.
Në emisionin “Këndi i Debatit” në Tëvë1, Shkodra tha se kjo narrativë është promovuar fillimisht nga zyrtarë të LDK-së, por sipas tij, nuk ka arritur të ketë ndikim të madh te elektorati.
“Është një narrativë që është tentuar të krijohet nga zyrtarët e LDK-së qysh në fillimet e fushatës. Z. Haziri ka tentuar ta fusë në diskursin politik idenë se kemi të bëjmë me një betejë ‘dhëmb për dhëmb’ mes zonjës Osmani dhe z. Kurti. Është tentuar që kësaj ideje t’i jepet më shumë peshë dhe vëmendje, por kjo nuk është vërejtur në elektorat”, tha Shkodra.
Ai vlerësoi se strategjitë e subjekteve politike gjatë fushatës kanë qenë interesante, duke veçuar qasjen e kryeministrit në detyrë, Albin Kurti.
“Taktikat që kanë ndjekur subjektet politike kanë qenë interesante. Sipas meje, z. Kurti nuk ka vendosur fare të merret me rivalët e tij politikë. Ndërkohë, ka pasur tentativa të vazhdueshme nga zonja Osmani për t’u marrë me z. Kurti”, u shpreh ai.
Shkodra shtoi se figurat që mbajnë pozita të larta shtetërore duhet të jenë të kujdesshme në deklarimet e tyre publike.
“Kur vjen nga pozicione të larta shtetërore, nuk mund të lëshohesh në hipoteza dhe të thuash se diçka është hipotetike. Je ndër njerëzit më të informuar në vend dhe kjo bart përgjegjësi shtesë në komunikim”, deklaroi Shkodra.
