Kampionia e Maqedonisë së Veriut, Shkëndija, nesër në orën 20:00 në stadiumin “Todor Proeski” në Shkup, e pret Ludogoretsin në ndeshjen e parë të fazës “play-off” tët Ligës së Evropës.
Trajneri I Shkëndijës, Jeton Beqiri pranon se Ludogoretsi i Bullgarisë, është favorit në letër, por insiston se ekipi i tij do të japë gjithçka për të arritur suksesin.
Nëse Shkëndija eliminon ekipin bullgar, atëherë do të luaj në fazën e grupeve të Ligës së Evropës, në të kundërtën do të vazhdoj me fazën e ligës në Ligën e Konferencës.
“Këto janë ndeshje të rëndësishme evropiane me kundërshtarë cilësorë. Por në këtë nivel nuk ke të drejtë të gabosh, sepse çdo pakujdesi dhe gabim paguhen shtrenjtë. Sa i përket Ludogoretsit, i kemi analizuar, por edhe ata kanë shumë ndryshime në përbërje. Në çdo rast, të jeni të sigurt se Shkëndija do të bëjë gjithçka që mundet për të dalë me rezultat pozitiv,” u shpreh trajneri Beqiri.
Në konferencën për shtyp të Shkëndijës, krahas trajnerit Beqiri u paraqit edhe mesfushori Reshat Ramadani.
Ai insistoi se ekipi është plotësisht gati për këtë ndeshje dhe për ta përballuar Ludogoretsin.
“Mendoj se jemi të përgatitur. Dëshira është maksimale dhe me siguri do të japim më shumë se maksimumi. E kemi analizuar Ludogoretsin dhe jemi të gatshëm për lojë të hapur,” tha Ramadani.
Ndeshja e kthimit mes Ludogoretsit dhe Shkëndijës, luhet javën e ardhshme në Bullgari.
