Shkëndija e Tetovës është vetëm një hap larg arritjes më të madhe në historinë e saj evropiane.
Sonte, kuqezinjtë do të zbresin në fushë në Bullgari për të zhvilluar ndeshjen e kthimit ndaj Ludogoretsit, në kuadër të “play-off”-it të Europa League.
Pas fitores 2:1 në sfidën e parë të zhvilluar në “Todor Proeski Arena” në Shkup, skuadra shqiptare nga Maqedonia e Veriut udhëton drejt Razgradit me një rezultat të favorshëm, por që kërkon përqendrim të plotë dhe disiplinë për t’u ruajtur.
Ky mund të jetë kualifikimi i parë historik i Shkëndijës në fazën e grupeve të Europa League, një arritje që do të vendoste emrin e klubit mes elitës së futbollit evropian.
Sfida ndaj Ludogoretsit do të luhet nga ora 19:30, ndërsa interesimi i tifozëve është i madh, jo vetëm në Tetovë, por në të gjithë hapësirën shqiptare.
Trajneri i Shkëndijës ka theksuar para ndeshjes se skuadra është e motivuar dhe e gatshme për të dhënë gjithçka në fushë.
Përballë do të kenë një kundërshtar me përvojë dhe cilësi, por duke pare lojërat dhe kualitetin e Shkëndijes, pse jo dhe mund ta shohim skuadrën kuq e zi në grupet e Ligës së Evropës.
