Shkëndija e Tetovës do të jetë pa sulmuesin Fiton Ademi në të dyja ndeshjet kundër Lodogoretsit në kuadër të fazës “play-off” të Ligës së Evropës.
Klubi tetovar, të mërkurën ka konfirmuar mungesën e Ademit, i cili shkaku i lëndimit do të mungojë për dhjetë ditë.
Ademi u dëmtua në ndeshjen kampionale kundër Makedonija Gj.P. dhe për këtë arsye nuk do të jetë në dispozicion të trajnerit Jeton Beqiri për tri duelet e ardhshme.
Krahas dy përballjeve me Ludogoretsin, Ademi do të mungojë edhe në ndeshjen kampionale kundër Arsimit.
Shkëndija, të enjten mbrëma e luan në Shkup ndeshjen e parë kundër Ludogoretsit, ndërsa ajo e kthimit do të zhvillohet pas një jave në Bullgari.
Nëse eliminonin Ludogoretsin, Shkëndija do të jetë në fazën e grupeve të Ligës së Evropës, në të kundërtën do të paraqitet në atë të Ligës së Konferencës.
