Shërbimi Korrektues i Kosovës ka shënuar një sukses të rëndësishëm ndërkombëtar, duke u renditur në mesin e pesë iniciativave më të mira në çmimin prestigjioz EuroPris Prison Award me projektin “Art from Prison: Transforming Incarceration into Opportunity”.
Sipas SHKK-së, vlerësimi u bë gjatë ceremonisë së mbajtur në Maltë, në kuadër të Mbledhjes së 15-të të Përgjithshme Vjetore të EuroPris, ku projekti nga Kosova u përzgjodh ndër pesë finalistët më të mirë në Evropë.
Krahas Kosovës, në mesin e vendeve të vlerësuara më së larti u renditën edhe Franca, Spanja, Portugalia dhe Greqia, duke e vendosur sistemin korrektues të Kosovës përkrah modeleve më të avancuara evropiane në fushën e rehabilitimit dhe risocializimit.
Projekti “Art from Prison: Transforming Incarceration into Opportunity”, i realizuar nga Qendra Korrektuese për Femra në Lipjan në bashkëpunim me OJQ MONUMENTA, u vlerësua për qasjen inovative në fuqizimin e grave të dënuara përmes artit, zhvillimit të aftësive kreative dhe krijimit të mundësive të reja për integrim në shoqëri.
Sipas panelit vlerësues të EuroPris, iniciativa u dallua për cilësinë, ndikimin dhe qasjen bashkëkohore në procesin rehabilitues.
Kontribut të rëndësishëm në realizimin e projektit ka dhënë edhe OJQ MONUMENTA përmes mbështetjes profesionale dhe organizimit të aktiviteteve artistike.
Drejtori i Përgjithshëm i Shërbimit Korrektues të Kosovës, Ismail Dibrani, falënderoi stafin korrektues, menaxhmentin e Qendrës Korrektuese për Femra në Lipjan dhe partnerët e projektit për angazhimin dhe përkushtimin e tyre.
Ai vlerësoi se ky sukses është rezultat i punës së përbashkët dhe dëshmi e avancimit të programeve rehabilituese dhe risocializuese në sistemin korrektues të Kosovës.
Dibrani falënderoi gjithashtu EuroPris për vlerësimin, duke theksuar se renditja në mesin e pesë më të mirëve përbën një motiv shtesë për forcimin e programeve ekzistuese dhe ngritjen e mëtejshme të standardeve profesionale.
“Ky vlerësim ndërkombëtar konfirmon edhe një herë se Shërbimi Korrektues i Kosovës po vazhdon të shënojë suksese të rëndësishme në arenën ndërkombëtare, duke promovuar praktika moderne dhe qasje efektive në rehabilitim dhe risocializim”, theksohet në fund të njoftimit./teve1.info/
