Shërbimi Korrektues i Kosovës sot ka shënuar 26-vjetorin e themelimit me një ceremoni zyrtare, ku morën pjesë drejtues të institucioneve të drejtësisë, përfaqësues të ambasadave, EULEX-it, si dhe partnerë vendorë e ndërkombëtarë.
Me këtë rast, fjalë rasti mbajtën drejtori i Përgjithshëm i SHKK-së, Ismail Dibrani, dhe Presidentja e Republikës së Kosovës, Vjosa Osmani.
Drejtori Dibrani tha se përgjatë një çerek shekulli ky institucion ka pësuar ndryshime të mëdha dhe ka avancuar ndjeshëm në standarde e profesionalizëm.
“Gjatë kësaj periudhe Shërbimi Korrektues është shndërruar në një institucion bashkëkohor që zbaton standardet dhe praktikat më të avancuara ndërkombëtare,” u shpreh Dibrani në fjalimin e tij.
Ndërsa Presidentja e vendit, Vjosa Osmani, vlerësoi punën dhe kontributin e stafit korrektues, duke theksuar rëndësinë e institucionit në funksionimin e shtetit.
“Ky shërbim, edhe pse pak i dukshëm për publikun, në botën demokratike njihet si një nga hallkat më të rëndësishme të shtetit. Kosova, falë punës suaj, ka treguar pjekuri, dinjitet dhe profesionalizëm,” tha Osmani në fjalën e saj përvjetore.
Ceremonia u mbyll me ndarjen e mirënjohjeve dhe prezantimin e punës së strukturave të SHKK-së përgjatë vitit të fundit.
