Bajram Qerkini, derisa mbylli sytë shkurtin e sivjetmë kërkoi gjurmët e djalit të tij të zhdukur, Reshatit.
Por, Bajrami u bë zëri i gjithë familjarëve që i patën të dashurit e tyre të pagjetur.
Ai ishte kryetar i Shoqatës së Personave të Pagjetur.
E zyra e saj nuk duhej mbyllur pa përfunduar misioni. Këtë ishte siguruar ta shkruajë në një letër.
“Ka thënë që mos ndaloni asnjëherë duke i kërku familjarët tanë se asnjëherë nuk e ka potencu axhën tonë por kishte lënë një letër në zyrën e tij në Mitrovicë ku sekretareshës së tij Gjylës iu është referu duke i thënë “Mos e mbyllë zyrën deri sa të gjendet Reshati” për axhën tim… Këshilla e gjyshit është që të punojmë për vendin tonë dhe ta duam sa më shumë”, ka deklaruar nipi i Qerkinit, Aidi.
Angazhimi i Bajram Cerkinit në kauzën për të pagjeturit u përmend edhe në Mbledhjen e Këshillit të Sigurimit të OKB-së.
Ishte vet shefja e UNMIK-ut Caroline Ziadeh që përkujtoi të ndjerin.
Ajo tha që trashëgimia e ish kryetarit të Shoqatës së Personave të Pagjetur vazhdon të udhëheqë rrugën në këtë drejtim.
“Në këtë kontekst dua të përkujtoj vdekjen e Bajram Çerkinit, babain e një djali të zhdukur me forcë që i ka kushtuar me dekada jete avokimit për të drejtën për të ditur, përpjekjet e të cilit kanë prekur shumë komunitete e etni. Ka qenë mishërim i humanizmit i të gjithëve që janë prekur”, tha ajo.
E kjo i bëri të lumtur familjen e tij.
Nipi i të ndjerit, Aidi tregon edhe rastet kur gjyshit i janë ndarë mirënjohje për punën që ka bërë.
“Për neve si familje ka qenë një ndjesi shumë e mirë sepse po e kuptojmë që nuk po harrohet i ndjeri edhe pse nga shefja nuk është harru asnjëherë për arsye se edhe në vitin 2023 ia ka ndarë një mirënjohje për shoqatën dhe për gjyshin e ndjerë tashmë ku ka treguar shumë mirënjohje për evokimin për të drejtën për të ditur për personat e pagjetur dhe çdoherë i është referuar si një person që nuk ka bërë dallime ndaj komuniteteve”, ka deklaruar ai.
Në mbledhjen e mbajtur të martën në New York, Ziadeh inkurajoi të gjitha palët të punojnë për të zbardhur fatin e personave të pagjetur.
Bajram Qerkini kishte vdekur në shkurt të këtij viti.
Përreth 25 vjet, ai është përpjekur për të ditur fatin e djalit të tij dhe të personave të tjerë të pagjetur nga lufta në Kosovë.
