Rrezik për sulme që kanë qëllim përçarjen etnike, paralajmëroi ambasadori amerikan. Kjo kërkohet të trajtohet me seriozitet jo vetëm nga institucionet e sigurisë, por edhe nga politikbërësit.
“Ka aktorë të huaj keqdashës aktivë, që duan të minojnë demokracinë në Kosovë, duke shfrytëzuar përçarjet etnike.”
Një paralajmërim të tillë, e dha të martën ambasadori amerikan, Jeff Hovenier në Kosovë.
Rreziku për sulme me motive etnike, vlerësohet si alarm për vendin.
Krahas institucioneve të sigurisë, reagim kërkohet edhe në rrafshin e politikbërësve.
“Nuk mjaftojnë vetëm organet e ruajtjes së rendit dhe ligjit dhe sigurisë, për ta stabilizuar një shtet. Ato janë disa mekanizma që për një kohë të caktuar krijojnë kushte për politikanë që t’i zgjidhin këto problem. Por, në fund të fundit politika është ajo që i zgjidh këto problem, jo mekanizmat e sigurisë. Dhe unë besoj që mesazhi ka qenë i drejtuar nga ana e ambasadorit amerikan kah mekanizmat politik”, ka thënë njohësi i sigurisë, Hysen Gecaj.
Serioziteti i rrezikut nga sulmet me qëllim përçarjen etnike, vlerësohet se qëndron nga institucioni se nga vjen ky paralajmërim.
“Duhet të jetë shumë serioze ngase flitet për ambasadorin e Shteteve të Bashkuara të Amerikës dhe dihet që ata kanë instrumente për paralajmërime të hershme. Në qoftë se instrumentet tona të paralajmërimit të hershëm mund ta kenë shkallën e parë, paralajmërimi i amerikanëve është i shkallës së tretë, i shkallës më të lartë të mundshme. Dhe kjo duhet të jetë shumë serioze”, ka thënë Fadil Kajtazi –njohës i cështjeve të sigurisë.
Nën dyshimet për përgatitje të sulmeve me motive etnike dhe spiunazh, gjatë këtij viti u arrestuan dy persona.
