Shtetet e Bashkuara dhe Britania e Madhe pritet të shpallin të enjten një marrëveshje tregtare që do të lehtësojë tarifat e vendosura nga ish-presidenti Donald Trump, duke sjellë një fitore politike si për kryeministrin britanik Keir Starmer, ashtu edhe për vetë Trump.
Presidenti amerikan njoftoi në platformën e tij “Truth Social” se marrëveshja do të jetë “e plotë dhe gjithëpërfshirëse,” megjithëse detajet ende nuk janë bërë publike. Mendohet se marrëveshja do të fokusohet në lehtësimin e tarifave për sektorë të veçantë, siç është industria automobilistike.
Kjo është marrëveshja e parë bilaterale tregtare që nga momenti kur Trump nisi politikën e tij agresive ekonomike, duke rritur në mënyrë të ndjeshme taksat mbi importet me synimin për të stimuluar prodhimin vendas.
Ai kishte premtuar edhe më shumë marrëveshje në vijim, të cilat, sipas tij, janë “në faza serioze të negociatave.”
Starmer, nga ana e tij, konfirmoi se bisedimet me SHBA kanë qenë të vazhdueshme dhe do të jepte më shumë detaje në orët në vijim, raporton AP.
Marrëveshja shënon një hap të rëndësishëm për Britaninë pas daljes nga Bashkimi Evropian, duke realizuar një nga premtimet e hershme të Brexit që dikur promovoheshin nga ish-kryeministri Boris Johnson: një marrëveshje tregtare me SHBA-në si shpërblim për pavarësinë tregtare.
