Vitin e kaluar janë pranuar mbi 52 mijë raste dhe është konfiskuar pasuri mbi 111 milionë euro. Kështu u bë e ditur në konferencën vjetore të prokurorit të shtetit. Aty morën pjesë ushtrues detyre kryeprokurori i Shtetit, Besim Kelmendi, ambasadori i SHBA-se, Jeffrey Hovenier, shefi i zyrës së BE-së, Tomas Szunyog dhe prokurorë e figura tjera të drejtësisë në Kosovë.
Përgatitjet janë bërë e gjithçka është gati.
Kjo pasi po mbahej konferenca vjetore e prokurorit të shtetit.
Në këtë ngjarje me rëndësi për drejtësinë morën pjesë prokurorë nga gjithë vendi, ambasadorë të akredituar në Kosovë, e figura tjetra politike.
Konferencën e hapi ushtruesi i detyrës së kryeprokurorit, Besim Kelmendi.
Ai tha se vetëm vitin e kaluar kanë pranuar mbi 52 mijë raste dhe është konfiskuar pasuri mbi 111 milionë euro.
Mbështetje të plotë Prokurorisë së Shtetit i dha Ambasadori i SHBA-së në Kosovë, Jeffery M. Hovenier i cili kërkoj që prokurorët të ruajnë pavarësinë e tyre.
Po ashtu në fjalën e tij, ambasadori ka bërë thirrje që Këshilli Prokurorial i Kosovës të sigurojë një proces të drejtë, transparent dhe meritor për përzgjedhjen e kryeprokurorit të ardhshëm të shtetit.
“Jam impresionuar me atë që kam parë me vendosmërinë tuaj dhe punën tuaj. Keni treguar përkushtim të madh. E di se puna e një prokurori nuk është e lehtë. Edhe pse mund të shiheni si figura të fuqishme është e pritshme që të kritikoheni me punën tuaj. Jam i bindur se është frustruese e ofenduese që të merrni kritika nga qytetarët e udhëheqësit e vendit. Dëshiroj të theksoj se durimi i këtyre kritikave që të mos ju pengojnë për të kryer punën tuaj është i rëndësishëm, duhet ta kryeni punën tuaj me profesionalizëm dhe pa ndikim”, deklaroi ambasadori amerikan, Jeff Hovenier.
Sikurse ambasadori amerikan, edhe ai i Bashkimit Evropian, Tomas Szunyog i dha mbështetje prokurorëve derisa ka theksuar se duhet të ndalohen kritikat e pushtetit ndaj tyre.
“Pavarësia e prokurorisë është e panegociueshme, duke garantuar që vendimet të bazohen vetëm në ligj dhe në themelet e rastit, pa asnjë ndikim apo ndërhyrje, qoftë të jashtme apo të brendshme. Kohët e fundit, për fat të keq, kam vërejtur deklarata të qeverisë në media që sulmojnë prokurorët dhe gjyqtarët. Unë e kam kritikuar publikisht këtë, duke nënvizuar rëndësinë themelore të pavarësisë së prokurorisë dhe gjykatave. Sulmet që tentojnë të ushtrojnë ndikim të padrejtë, apo minojnë autoritetin e institucioneve janë të papranueshme dhe duhet të largohen”, deklaroi ambasadori i BE-së, Tomas Szunyog.
Tutje ambasadori theksoi se luftimi i krimit të organizuar dhe korrupsionit, është çështje që kërkon vëmendje, ndërsa shtoi se BE-ja do t’i mbështesë në sfidat e reja që mund të përballen.
Ndër të tjera në këtë konferencë iu dha rasti që edhe prokurorëve tjerë të bëjnë prezantime për punën që është bërë gjatë vitit 2023.
