Xherdan Shaqiri ka insistuar se do të jetë 100 për qind i gatshëm për ta ndihmuar Zvicrën në “Euro 2024” që këtë verë mbahet në Gjermani.
Futbollisti shqiptar ka pranuar se për momentin nuk është ende i gatshëm, por deri në verë do të përgatitet në çdo aspekt. Shaqiri, të martën mbrëma ia siguroi Zvicrës fitoren 1:0 ndaj Irlandës, me një gol të bukur që e realizoi nga gjuajtja e lirë.
“Po, nuk jam gati 100 për qind për momentin. Por, kur unë nuk kam qenë gati për turne të mëdhenj? Kjo është pyetja. Si lojtar, patjetër që duhet të jesh gati kur i duhesh ekipit, sidomos për turne të tillë. Ky është synimi im, pra ta ndihmoj Zvicrën sërish në verë kur edhe do të jem plotësisht i gatshëm dhe i përgatitur në çdo aspekt”, ka thënë Shaqiri.
Shaqiri ishte titullar ndaj Irlandës dhe luajti deri në minutën e 75-të, por në barazimin pa gola kundër Danimarkës të shtunën e shkuar, ai u inkuadrua nga stoli në 15-të minutat e fundit të ndeshjes.
Shaqiri ka zbuluar se ishte marrë vesh me selektorin Murat Yakin që me Danimarkën të inkuadrohej nga stoli, ndërsa me Irlandën të ishte titullar.
Po ashtu, Shaqiri ka thënë se ka raporte shumë të mira me selektorin Yakin dhe se ndihet I lumtur që e ka shënuar golin e 30-të me fanellën e Zvicrës.
