Shala thotë se ky vendim do prodhojë tensione, teksa theksoi se u lejua si pasojë e “egos politike” të Kurtit.
“Janë shprehur thellë të zhgënjyer, sepse ndoshta egoja politike e kryeministrit aktual e ka lejuar një vendim të tillë, por në aspektin e sigurisë do të prodhojë tensione të cilat ndoshta deri më tani nuk i kemi kalkuluar në tavolinë. Pra ne nuk dimë se si do të zbatohet pavarësisht deklarimit medial që është bërë nga Policia e Kosovës, një raport se si do duket faza e parë e qortimit”, tha ai në “Ditari” në Tëvë 1.
Njohësi i çështjeve të sigurisë potencoi se kryeministri Kurti duhet të reflektojë, pasi siç tha ai, sa i përket fazës së parë nuk pret ndonjë rezultat konkret.
Vendimi i Qeverisë për targat parashihet të zgjasë deri më 21 prill, por do të jetë i ndarë në disa faza.
Për tri javë, nga 1 nëntori deri më 21 nëntor do të jetë masa e qortimit për serbët që nuk konvertojnë targat në RKS, pastaj për dy muaj deri më 21 janar do të jetë masa e gjobitjes dhe më pastaj, nga 21 janari do të ketë targa provuese për dy muaj të tjerë, pas së cilës datë më 21 prill, nuk do të lejohen targa të tjera në Republikën e Kosovës. /Teve1.info/
