Anëtari i PDK-së, Ferat Shala, ka deklaruar se rritja e pagës minimale për sektorin privat – nga 350 në 425 euro që pritet të hyjë në fuqi nga janari – përbën një ofertë elektorale të kryeministrit në detyrë, Albin Kurti.
I pyetur lidhur me zgjedhjet e 25 dhjetorit dhe çështjen e koalicioneve, Shala theksoi se Nisma ka shprehur interesim për bashkëpunim me PDK-në pas zgjedhjeve.
Sipas tij, ky interesim ka ardhur me vonesë, pasi në atë fazë tashmë kishin përfunduar diskutimet e brendshme për çështjet kryesore.
Ai shtoi se PDK ka shprehur gatishmërinë për të marrë përgjegjësinë e organizimit dhe udhëheqjes së qeverisë bashkë me partitë opozitare.
Megjithatë, Shala tha se me Nismën dhe LDK-në nuk është arritur mirëkuptim për krijimin e një qeverie të përbashkët opozitare.
Ndërkohë, ai akuzoi qeverinë se ka vonuar qëllimisht krijimin e institucioneve dhe ka bërë shkelje kushtetuese e ligjore për të pasur hapësirë më të madhe manovrimi me buxhetin e shtetit.
“Kjo qeveri që nga ardhja në pushtet deri në këto momente vazhdon me logjikën e njëjtë, duke e trajtuar në mënyrë abuzive opozitën pa kulturë, pa sjellje dhe pa bashkëpunim. Paga e rritjes minimale prej janarit, është një ofertë elektorale, këta qëllimisht e kanë vonuar themelimin e institucioneve, kanë bërë dhjetëra shkelje kushtetuese dhe ligjore në mënyrë që ta kenë krahun tjetër të lirë për të operuar me buxhetin e shtetit.
Nisma ka pasur një interesim, që një pjesë e madhe gjithë e kemi shprehur dhe mirëpritur gatishmërinë e tyre edhe pse kjo ka qenë tepër vonë dhe ne kemi qenë në një fazë kur është mbyllur debati i brendshëm edhe për shumë çka tjetër, unë konsideroj dhe vetë ata kanë thënë që pas zgjedhjeve. Ka qenë shumë vonë për veprime të tilla të mëdha që ne ta kemi një situatë tjetër përkundër dëshirës së madhe. PDK e ka pasur të qartë dhe kemi qenë të gatshëm ta marrim përgjegjësinë e organizimit dhe udhëheqjes së qeverisë me partitë opozitare, pikërisht Hamza e ka bërë të qartë dhe Krasniqi që ne e kemi gatishmërinë ta marrim udhëheqjen dhe ta krijojmë qeverinë në mënyrë që vendi mos mbetet kështu siç ka mbet, nuk kemi gjetur mirëkuptim me shumicën e partive opozitare as me Nismën e as me LDK-në, që ne ta bëjmë një qeveri të përbashkët opozitare, arsyet kanë qenë demokratike”, ka deklaruar Shala në emisionin “Ditari” në Tëvë1./teve1.info/
