Shala tha se përveç vendeve të Quint-it, e njëjta vlen edhe për ambasadorët e këtij vendi, të cilët po ashtu e shohin Konjufcën si person i duhur për të vazhduar proceset e caktuara.
“BE-ja, ambasadorët e Quint-it e preferojnë kryekuvendarin si person që mundet të vazhdojë procesin drejt arritjes së një marrëveshje finale mes Kosovës dhe Serbisë. Vendet e Quint-it kanë dëshirë që ish-presidentja të jetë një kandidate serioze sa i përket postit të një ekipi të unitetit”, tha ai në emisionin “Infonata” në Tëvë1.
Teksa tutje shtoi se ish-presidentja Jahjaga ka një raport mjaft të mirë më SHBA-në, e krejt kjo falë karizmit të saj.
“Jahjaga përfundoi mandatin 5 vjeçar, është një person që nga karizmi i saj ka një lidhje jashtëzakonisht të ngushtë me Shtetet e Bashkuara të Amerikës dhe është e pranuar nga SHBA-ja që të vazhdojë të jetë pjesë përbërëse në mënyrë aktive të politikës së saj”, shtoi ai tutje.
Ndërsa, sa i përket kryetarit të kuvendit, analisti Drizan Shala tha se ndryshe nga Jahjaga, ai është i pranuar edhe nga partitë opozitare, pra përveç nga vendet e Quint-it.
Gjithashtu, Shala shtoi se Konjufca është i vetmi zyrëtar i lartë shtetëror që mban takime të përditshme.
“Në anën tjetër ne e kemi një kryekuvendar, Glauk Konjufca i cili ka një element më shumë se sa ish-presidentja Jahjaga, është i pranuar edhe nga partitë opozitare. Kjo e bën njeri të rëndësishëm sa i përket arritjes së një komunikimi, sepse është i vetmi person me nivel të lartë që ka takime të përditshme, ka një qasje pro-aktive, ka një diskurs më të butë, ka një vizion dhe një qëllim”, tha ai.
