Deputeti i Kuvendit të Kosovës nga radhët e Ferat Shala, ka kritikuar draftligjet e propozuara nga Qeveria e Kosovës, duke thënë se ato prekin bazamentin juridik, ekonomik dhe organizativ të sektorit të energjisë.
Në sallën plenare të Kuvendit, Shala theksoi se energjia është çështje me interes nacional dhe se vendi duhet të fokusohet në mënyrën e menaxhimit dhe zhvillimit të këtij sektori, sidomos në kushtet e krizës globale energjetike.
“Qeveria po na sjell dy draftligje që prekin bazamentin strukturor juridik, ekonomik dhe organizativ të sektorit të energjisë. Jeni dëshmitarë që i gjithë globi temë aktuale e ka energjinë, deri në shkallën e luftërave frontale për burime energjetike dhe asetet e tyre. Ndërsa, ne sot në vend që ta kemi në temë debati mënyrën e organizimit, menaxhimit, daljes nga kjo krizë globale, maksimalizimin e resurseve, harmonizimin me politikat reale zhvillimore të vendit, na sjellet një paketë ligjesh ku baza juridike dhe ekonomike centralizohet, jashtë çdo parimi etik në raport me tregun dhe zhvillimet globale, por mbi të gjitha me interesin tonë nacional, sepse energjia është interes nacional i vendit tonë,” tha Shala.
Shala shtoi se Kosova duhet të fokusohet në shfrytëzimin maksimal të resurseve energjetike dhe në përshtatjen me politikat zhvillimore, duke e konsideruar energjinë si sektor strategjik për vendin.
