Autor: Besarta Mehmeti
Në mungesë të Rusisë, 2/3 e vendeve anëtare të kësaj organizate e njohin pavarësinë e Kosovës dhe duke qenë se vendimet merren me shumicë, gjasat për t’u pranuar po shihen si reale për anëtarësim në KE.
Njohësi i çështjeve të Ballkanit Perëndimor, Daniel Serwer, po shpreson se anëtarësimi do të jetë i suksesshëm.
Serwer në një përgjigje për Teve1.info ka treguar përfitimet e Kosovës nëse pranohet në Këshill të Evropës.
Ai thotë se njëra nga përfitimet kryesore është qasja e qytetarëve të Kosovës në Gjykatën Evropiane për të Drejtat e Njeriut.
“Shpresoj. Një nga përfitimet kryesore është qasja e qytetarëve të Kosovës në Gjykatën Evropiane për të Drejtat e Njeriut. Anëtarësimi është njëkohësisht konfirmim i demokracisë së një shteti dhe mjet për t’i mbajtur anëtarët e shtetit demokratik. Ai gjithashtu ofron mbështetje të rëndësishme për sundimin e ligjit, veçanërisht në trajtimin e popullsive minoritare”, tha Serwer.
Madje, ai foli edhe sa i përket qëndrimit të Serbisë lidhur me dorëzimin e kërkesës së Kosovës për pranim në KE. Ku pas aplikimit, presidenti i shtetit fqinjë Aleksandar Vuçiq u deklarua duke thënë se është “prishur” marrëveshja e Washingonit.
Njohësi i cështjeve ndërkombëtare, reagimin e Vuçiqit e krahasoi figurativisht, duke thënë se “Ata që janë në shtëpi prej xhami, nuk duhet të hedhin gurë”, duke ju referuar shumë marrëveshjeve të cilat Serbia nuk i respekton kur bëhet fjalë për Kosovën.
“Unë do t’ua lë këtë çështje njerëzve që mbështesin më shumë marrëveshjen e Uashingtonit se unë. Por ata që janë në shtëpi prej xhami nuk duhet të hedhin gurë. A i ka zbatuar Serbia të gjitha detyrimet e saj sipas marrëveshjes?”, deklaroi Serwer për Teve1.info
E sa i përket dialogut me Serbinë, profesori nga Johns Hopkins University, thotë se derisa Vuçiqi e vë në dyshim pavarësinë e Kosovës, nuk mund të ketë normalizim të dialogut.
“Presidenti Vuçiq vazhdon të vërë në dyshim shtetësinë, pavarësinë dhe sovranitetin e Kosovës. Për sa kohë që ai bën, dialogu nuk mund të prodhojë normalizim. Megjithatë, ai mund të prodhojë hapa në atë drejtim”, theksoi Daniel Serwer profesori nga universiteti John Hopkins.
Ndryshe, të enjtën Qeveria e Kosovës ka miratuar nismën për anëtarësim në Këshillin e Evropës, vendim i cili obligon Ministrinë e Punëve të Jashtme dhe Diasporës, të zhvillojë të gjitha procedurat për anëtarësim në bazë të legjislacionit në fuqi.
E menjëherë pas këtij vendimi, ministrja e Jashtme Donika Gërvalla, e dorëzoi edhe zyrtarisht aplikimin për në Këshill të Evropës në Strasburg të Francës, ku pas dorëzimit, ajo u shpreh optimiste për pranimin e Kosovës.
Sipas saj me këtë veprim, hapet një kapitull i ri për Kosovën.
“Në emër të Kosovës dorëzuam kërkesën për anëtarësim në Këshillin e Evropës. Sot hapet një kapitull i ri për Kosovën në Këshillin e Evropës, sot fillon procedura e shqyrtimit të kërkesës sonë e cila do të kalojë nëpër instanca të ndryshme të Këshillit të Evropës, të Asamblesë Parlamentare dhe në fund edhe të Këshillit ministror”, ka thënë ajo.
Ndërkohë, nuk i vonua edhe Daniel Holtgen, zëdhënës i Këshillit të Evropës, i cili në një përgjigje për Teve1.info, e konfirmoi dje se e kanë pranuar aplikimin e Kosovës për anëtarësim.
“Ne mund të konfirmojmë se aplikimi për anëtarësim është pranuar dhe po i transmetohet Komitetit të Ministrave në përputhje me statutin e Këshillit të Evropës”, ka thënë ai.
Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës.
Këshilli mbron lirinë e shprehjes dhe të mediave, barazinë dhe minoritetet në vendet anëtare. I njëjti u ndihmon vendeve anëtare që të luftojnë korrupsionin dhe terrorizmin si dhe që të kryejnë reformat e duhura gjyqësore. /Teve1.info/
