Analisti politik, Artan Alijaj, ka komentuar zhvillimet e fundit brenda Partisë Demokratike të Kosovës, pas dorëheqjes së Memli Krasniqit dhe thirrjes së menjëhershme të Konventës për të hënën, ku pritet të zgjidhet kryetari i ri i partisë.
Sipas Alijajt, dorëheqja e Krasniqit ishte një surprizë për opinionin publik, por garat e krijuara brenda PDK-së mes kandidaturës së Bedri Hamzës dhe asaj të njoftuar nga Enver Hoxhaj duhen parë si proces pozitiv.
“Ishte pak surprizë dorëheqja për opinionin publik. Mirëpo, kjo që ka ndodh me kandidaturën e Hamzës dhe Hoxhajt – mendoj që janë zhvillime pozitive, duhet të shihen si të tilla. Ne presim që çdo parti të ketë një debat të tillë, pse jo edhe në publik – ku individë të caktuar mund të shpallin kandidaturën e tyre, dhe pastaj të zhvillohet një garë aty”, deklaroi ai në emisioni “Info Nata”.
Ndërkohë, Alijaj vlerëson se afati statutar prej pesë ditësh për mbajtjen e Konventës nuk është domosdoshmërisht pengesë që PDK-ja ta shtyjë procesin, nëse vlerësohet se gara e brendshme e kërkon një gjë të tillë.
“Është e rregulluar me statut të partisë që në rastet kur jep dorëheqje kryetari – të ketë afat pesëditor për thirrjen e Kuvendit, mirëpo nuk do të thotë që kjo është pengesë nëse veç shihet se ka garë brenda partisë, nuk do të thotë që partia nuk mund ta zgjasë këtë afat”, tha Alijaj.
Sipas tij, kërkesa e Hoxhajt për shtyrje të Konventës lidhet me nevojën për një periudhë më të gjatë për të komunikuar me strukturat e partisë dhe për të siguruar mbështetje.
“Duket se Hoxhaj kërkon më shumë kohë, mbase dëshiron që të ketë mundësi për të biseduar me njerëzit e partisë, të mbledh edhe nënshkrime. Mirëpo, ideja është që në garë ata duhet edhe ta prezantojnë veten dhe planet e tyre”, u shpreh ai. /teve1.info/
PDK drejt zgjedhjes së kryetarit të ri – debat për datën e Konventës
