Deputeti i Lidhjes Demokratike të Kosovës, Paris Guri, ka drejtuar kritika të ashpra ndaj Lëvizjes Vetëvendosje, duke e akuzuar atë për uzurpim të institucioneve dhe bllokim të procesit politik në vend.
Sipas tij, situata aktuale në Kosovë nuk është as demokratike e as e pranueshme për një shtet që synon standarde evropiane të qeverisjes.
“Nuk mundet në një shtet demokratik, në vitin 2025, të uzurpohen institucionet nga një parti që ka 48 deputetë. Populli nuk të ka votuar për t’i bllokuar institucionet për nëntë muaj rresht”, deklaroi Guri në emisionin “Info Nata” në Tëvë1.
Ai theksoi se mosfunksionimi institucional po cenon rendin kushtetues, ligjet e Kosovës dhe vendimet e Gjykatës Supreme, ndërsa akuzoi qeverinë në detyrë se po merr vendime të jashtëligjshme.
“Gjëja më demokratike, më e shëndetshme për demokracinë e Kosovës është me shkua në zgjedhje sa më herët, sepse jemi duke e cenuar rendin kushtetues, jemi duke i cenuar ligjet e Kosovës, jemi duke i cenuar vendimet e Gjykatës Supreme me këtë qeverisje që është në detyrë, që janë duke marrë vendime të jashtëligjshme. Kështu që sa më parë që shkojmë në zgjedhje është më mirë për shëndetin e demokracisë së Kosovës”
Guri përsëriti se rruga më demokratike dhe më e drejtë është që vendi të shkojë në zgjedhje të parakohshme sa më shpejt, për t’i dhënë fund, siç tha ai, bllokadës institucionale.
