Pothuajse tash e katër orë rruga që çon për në Shtërpcë është bllokuar në të dy drejtimet e lëvizjes.
Lajmin për Teve1.info e ka konfirmuar zëdhënësi i Policisë për rajonin e Ferizajt, Kanun Veseli.
Ai ka thënë se në lidhje me rastin e plagosjes janë grumbulluar qytetarët serbë, mirëpo sipas tij, Policia po negocion me ta pasi edhe është arrestuar i dyshuari.
Por pavarësisht kësaj, edhe më tutje rruga vazhdon të jetë e bllokuar. Madje Policia e Kosovës është vendosur rreth një kilometër para se të shkohet te vendi ku janë mbledhur protestuesit serbë dhe nuk po lejohet as mediat që të afrohen në atë pjesë.
Sot një 11-vjeçar dhe një 21-vjeçar janë plagosur në fshatin Drajkovc të Shtërpcës. Më pas, Policia ka arrestuar të dyshuarin për plagosjen e dy serbëve dhe i njëjti është shoqëruar në Policinë Rajonale të Ferizajt. Sipas PK-së, i dyshuari është i moshës 33-vjeçare. /Teve1.info/
