Nuk do ta kenë mundësinë që të votojnë brenda territorit të Kosovës për zgjedhjet presidenciale dhe ato të përgjithshme në Serbi.
Marrë parasysh edhe praktikën nga e kaluara, kësaj radhe, serbët e Kosovës po shprehen të zhgënjyer me vendimin e Qeverisë Kurti.
Igor Markoviq nga shoqëria civile në Mitrovicën e Veriut, thotë se do të udhëtojë në Serbi për të votuar. Ai kritikon vendimin e Kryeministrit Kurti, për moslejimin e votimeve brenda territorit të Kosovës. Sipas tij ky ishte një vendim populist.
“Për mua nuk përbën ndonjë befasi vendimi i Kryeministrit Kurti, duke pasur parasysh vendimet e tij nga e kaluara. Nuk mendoj se është një vendim i mirë për të mos lejuar serbët që të votojnë, është një e drejtë demokratike. Çështja tjetër është se këtë vendim e kanë kritikuar edhe shtetet perëndimore, dhe tani presioni do të jetë mbi Qeverinë Kosovën. Por natyrisht që Kurti e sheh këtë si një sukses”, tha Markoviq.
Edhe Ljubomir Maksimoviq, i cili jeton në Çagllavicë, thotë se do të shkojë në Serbi për të votuar, ndonëse më me dëshirë këtë gjë do tra bënte në Kosovë.
“Po, s’e di si do t’ia bëjnë me votime. Ende s’kanë sjellë vendim final, por nëse do të jetë në Serbinë qendrore, atëherë ashtu do të jetë dhe do të shkojmë. Por unë do të kisha dashur të ishte në Kosovë”, tha ai.
Kutive të votimit në Serbi ua kanë mësyrë edhe Bobdan Petroviq e Bilana Markoviq.
“Po, natyrisht. Do të dal në votime. Ashtu si kërkon Republika e Serbisë nga të gjithë ne, do të dal edhe unë më “3 prill” këtë vit në votime”, tha Petroviq.
“Ne serbët këtu ndjehemi qytetarë të Kosovës por edhe të Serbisë, prandaj unë e ndjej si obligim që të shkoj të votoj në Serbi”, tha Markoviq.
Presidenti serb, Aleksandër Vuciq ka deklaruar se ai mund të marrë rreth 50.000 vota më pak për shkak të vendimit të autoriteteve të Kosovës.
Ndërkohë që vendet e QUINT-it kanë shprehur zhgënjimin e tyre për faktin se Qeveria e Kosovës nuk gjeti një zgjidhje kreative për këtë rast.
Raporti i gazetarit, Shpat Blakçori.
