Aleanca për Ardhmërinë e Kosovës (AAK) ka reaguar ndaj ekspozitës së vendosur në Prishtinë për masakrat e luftës, duke e akuzuar atë për shtrembërim të qëllimshëm të së vërtetës historike.
Në një reagim publik, AAK vlerëson se përmbajtja e kësaj ekspozite tenton të relativizojë krimet e kryera nga shteti serb ndaj popullit shqiptar gjatë luftës së fundit në Kosovë. Sipas kësaj partie, përpjekje të tilla përbëjnë sulm të drejtpërdrejtë ndaj viktimave dhe kujtimit të tyre.
AAK thekson se ekspozita jo vetëm që cenon të vërtetën historike, por edhe lëndon rëndë ndjenjat e familjeve të të vrarëve dhe të gjithë shoqërisë, duke tentuar të zbehë përgjegjësinë për krimet e kryera.
Tutje, kjo parti e cilëson të papranueshme dhe fyese për kujtesën kolektive çdo përpjekje për rishkrim të historisë dhe relativizim të krimeve, duke kërkuar që veprime të tilla të mos tolerohen në asnjë formë.
Po ashtu, AAK kërkon që përgjegjësit për këtë rast të mbajnë përgjegjësi, ndërsa ka përmendur edhe autorin e ekspozitës, Shkëlzen Gashi, duke theksuar se ai ka qenë ish-këshilltar në kabinetin e kryeministrit Albin Kurti, gjë që sipas tyre e bën edhe më shqetësues promovimin e këtyre narrativave.
“Përpjekjet për të rishkruar historinë dhe për të relativizuar krimet e kryera ndaj popullit shqiptar janë të papranueshme dhe përbëjnë një sulm të drejtpërdrejtë ndaj viktimave dhe kujtimit të tyre. Ekspozita të tilla jo vetëm që cenojnë të vërtetën historike, por edhe lëndojnë rëndë ndjenjat e familjeve të të vrarëve dhe gjithë shoqërisë sonë, duke tentuar të zbehin përgjegjësinë për krimet e kryera”, thuhet në reagim.
