Liderët e Bashkimit evropian dhe ata të Ballkanit Perëndimor u bënë bashkë në samitin që këtë vit po mbahet në Tivat të Malit të Zi.
Zgjerimi i bllokut po vlerësohet si strategjik, për përballimin e sfidave të sigurisë dhe ekonomisë.
Si temë diskutimi ishte edhe propozimi i Gjermanisë dhe Francës.
Dy shtetet paraqitën një non-paper, përmes të cilit propozojnë integrimin gradual të vendeve të Ballkanit Perëndimor dhe Moldavisë në programet dhe politikat e Bashkimit Evropian.
Qëllimi i kësaj nisme është përshpejtimi i integrimit të vendeve kandidate dhe dhënia e një shtyse të re për reforma.
Presidenti francez, Emanul Macron e konfirmoi se ky propozim do të diskutohet.
“Tani do të zhvillojmë bisedime me të gjitha vendet e Ballkanit Perëndimor për këtë çështje. Kjo është qartazi një nga lidhjet tona kryesore, së bashku me perspektivën e zgjerimit, e cila është jashtëzakonisht e rëndësishme edhe nga këndvështrimi gjeopolitik. Në këtë rajon bëhet fjalë për pavarësinë evropiane në fusha si energjia, siguria dhe menaxhimi i rrugëve migratore. Prandaj është shumë e rëndësishme që të jemi në gjendje të ecim përpara”.
E kancelari gjerman, Friedrich Merz, vlerësoi se procesi i zgjerimit të BE-së po ecën shumë ngadalë dhe se nevojiten ide të reja për t’i nxitur më tej vendet e rajonit në zbatimin e reformave.
“Natyrisht, ka një sërë çështjesh të cilave duhet t’u japim përgjigje dhe për të cilat duhet të veprojmë së bashku. Por, gjithçka tregon se kjo pjesë e Evropës ka një perspektivë evropiane dhe i përket Bashkimit Evropian. Fakti që prej 13 vitesh nuk kemi pranuar asnjë anëtare të re tregon se mangësi ka pasur edhe në anën e Bashkimit Evropian. Pikërisht këtë duam ta tejkalojmë sot”, deklaroi kancelari gjerman para fillimit të samitit.
Gjatë takimit, Presidentja e Komisionit Evropian, Ursula von der Leyen, bëri thirrje për përshpejtimin e procesit të anëtarësimit.
“Zgjerimi bazohet në merita, por të qenit i bazuar në merita nuk do të thotë të jetë i ngadalshëm. Ne duhet ta bëjmë procesin e zgjerimit më të shpejtë dhe më të besueshëm. Me fjalë të tjera, nëse vendi kandidat përmbush reformat, ai duhet të ecë përpara në mbylljen dhe hapjen e kapitujve dhe grupeve të kapitujve në rrugën e tij drejt Bashkimit Evropian. Dhe procesi i zgjerimit duhet të jetë më i dukshëm”.
Kosova në këtë samit po përfaqësohet nga ushtruesja e detyrës së Presidentes, Albulena Haxhiu.
“Nga ky samit presim diskutime të frytshme nga të gjithë përfaqësuesit dhe rezultate pozitive. Kjo është arsyeja pse Kosova meriton pyetësorin, statusin e kandidatit dhe hapjen e negociatave. Duhet të theksoj se integrimi në BE nuk është vetëm një proces teknik. Ka të bëjë me prosperitetin, ka të bëjë me paqen, demokracinë dhe dinjitetin për Evropën dhe për popullin tonë”, tha ajo.
Një nga temat kryesore të rendit të ditës në këtë samit është edhe anëtarësimi i Malit të Zi në BE.
