Kryesia e Degës së PDK-së në Skenderaj ka mbështetur unanimisht rikandidimin e Sami Lushtakut për kryetar të komunës në zgjedhjet lokale të 12 tetorit.
Në postim në Facebook, Lushtaku tha se ky vendim është përgjigje ndaj besimit të qytetarëve dhe siç tha “padrejtësive që i janë bërë në të kaluarën”.
“Ky vendim i imi erdhi si përgjigje ndaj besimit tuaj të vazhdueshëm ndaj meje në çdo palë zgjedhje, prej që jam futur në politikë”, tha Lushtaku, duke rikujtuar periudhën katërvjeçare të burgimit gjatë viteve 2013–2017, nga e cila në fund është shpallur i pafajshëm. Ai po ashtu përmendi edhe ndalimin e kandidaturës së tij në zgjedhjet e vitit 2021, për të cilin fajësoi presionet politike nga pushteti aktual.
Unë jam prej atyre njerëzve që nuk ndalen. Unë i kam borxh të përjetshëm Skenderajt, qytetarëve të tij dhe çdo njeriu që e ka në zemër Drenicën”, u shpreh Lushtaku.
Ai theksoi se kandidimi i tij është një thirrje për bashkim, zhvillim dhe drejtësi për Skenderajn.
Ai premtoi një udhëheqje të drejtë dhe projekte konkrete për komunën, ndërsa paralajmëroi se programi i plotë do të prezantohet në javët e ardhshme.
Në fund të deklaratës së tij, Lushtaku falënderoi kryetarin aktual të komunës, Fadil Nura, për bashkëpunimin dhe punën e bërë deri më tani.
“Duke qenë mirënjohës përjetë për besimin dhe mbështetjen tuaj ndaj meje dhe ndaj Partisë Demokratike të Kosovës, do të jemi bashkë si gjithmonë në çdo proces!”, përfundoi ai.
