Ish-deputeti i Lidhjes Demokratike të Kosovës (LDK), Adem Salihaj, ka deklaruar se kryetari aktual i LDK-së, Lumir Abdixhiku, po përballet me presione të brendshme për të mos dhënë dorëheqje nga posti i tij.
Sipas Salihajt, këto presione dyshohet se vijnë nga Dega e LDK-së në Pejë, e cila, sipas tij, ka qenë kategorike kundër dorëheqjes së Abdixhikut.
“E kam një përshtypje që Abdixhiku ka presione prej dika që të mos hiqet. Unë i shoh presionet që vijnë nga Peja disi, nga kush konkretisht duhet një analizë pak më e thellë. Dega e LDK-së në Pejë ka qenë kategorike që të mos jap dorëheqje. Unë mendoj që atje në Pejë është dikush që e kërkon Abdixhikun që të rrijë si kryetar”, deklaroi ai në emsionin “Këndi i Debatit” në Tëvë1.
Ai shtoi se kjo bindje i është krijuar duke u bazuar në ndryshimin e qëndrimeve të Abdixhikut pas zgjedhjeve.
“E kam një përshtypje të tillë për presione, pasi që ndryshoi shumë prej natës së zgjedhjeve kur u deklarua për reflektim e deri tash ka evoluar çështja e dorëheqjes”, tha ai.
Deklaratat e Salihajt vijnë në prag të Kuvendit të LDK-së, ku pritet të diskutohet çështja e votëbesimit për kryetarin aktual të partisë, Lumir Abdixhiku. /teve1.info/
