Mesfushori i Ferizajt, Edon Sadriu e ka fituar epitetin e futbollistit më të mirë për xhiron e nëntë të Superliës së Kosovës.
FFK-ja, ka njoftuar të hënën se Sadriu është zgjedhur “Ylli i Javës”, çmim ky që ndahet për lojtarin më paraqitjen më të mirë pas përfundimit të secilës xhiro.
Komisioni i Veteranëve i futbollit ka vlerësuar se Sadriu ishte më i miri i javës, pasi ishte tejet i dobishëm për fitoren e Ferizajt në udhëtim te Gjilani.
Ferizaj mori tri pikë të rëndësishme në Gjilan pasi fitoi 2:1, ndërsa Sadriu në këtë triumph kontribuoi me gol duke e zhbllokuar rezultatin e ndeshjes.
Pasi mori çmimin e lojtarit më të mirë, Sadriu u shpreh tejet i lumtur dhe si kapiten i Ferizajt insistoi se do të vazhdojnë me rezultate të mira.
Ai falënderoi bashkëlojtarët e tij për të cilët insistoi se janë më meritorët për çmimin “Ylli i Javës”, të cilin e mori për herë të parë këtë sezon.
Aktualisht, Ferizaj është në pozitën e shtatë në tabelë me 10 pikë të mbledhura dhe në xhiron e dhjetë luan kundër Feronikelit ’74 në Drenas.
