Për një periudhë afër 10 muajshe, në Kosovë u mbajtën dy palë zgjedhje.
Mirëpo, nëse këtë të diel nuk formohet Qeveria, deri në përfundim të vitit pritet që në vend të ketë sërish zgjedhje parlamentare.
E gjithë kjo sipas ish kryetarit të Komisionit Qendror të Zgjedhjeve, Mazllum Baraliu, do t’i kushtojë buxhetit të shtetit.
“I kushton shumë, mesatarisht 6 milionë euro thuhet se kushton një proces zgjedhor, ndoshta edhe më shumë varet krejtësisht nga rrethanat dhe investimet që bëjnë subjektet politike, institucionet e vendit, pra kushton shumë këto 4 parë zgjedhje ndoshta mund të jenë afër 30 milionë euro që është humbje e madhe në kuptimin financiar”, tha Baraliu.
Përveç kësaj, sipas Baraliut humbjet janë më të mëdha në mungesë të institucioneve.
“Nuk funksionojnë bordet, nuk funksionojnë agjencitë e ndryshme, dhe institucionet e pavarura për shkak të kuorumeve, mungesës së kuorumit. Pra humbjet janë të shumta, mos të flasim për humbje në kohë, pastaj secili proces zgjedhor kërkon angazhim politik, angazhim në terren. Keni parasysh që tek ne përgatitjet fillojnë me herët, në diasporë…”.
Edhe sipas njohësit të ekonomisë, Kushtrim Ahmeti, bllokada institucionale i ka sjellë dëme miliona euro Kosovës.
“Na nuk e kemi komoditetin që të mbajmë kaq shpesh zgjedhje sepse ne e dimë shumë mirë sa është e ndërlidhur ekonomia jonë nga vendimet e shumta qeveritare. Llogarite ne i kemi gjitha vendet e rajonit, që po marrin mjetet nga BE-ja dhe Kosova nuk po merr asnjë cent. Kemi një numër i marrëveshjeve ndërkombëtare që vlera e të njëjta kap shifrën 1 miliard euro të cilat kanë mbetur të bllokuara”, deklaroi Ahmeti.
Në zgjedhjet e 9 shkurtit për Kuvend të Kosovës nga 28 subjekte politike u shpenzuan gati katër milionë euro.
