Trajneri i Manchester United, Ruben Amorim, ka deklaruar se objektivi i klubit është të fitojë Ligën Premier brenda tre viteve të ardhshme, duke theksuar rëndësinë e ndërtimit gradual të skuadrës përmes hapave të vegjël.
Duke folur për Sky Sports, tekniku portugez tregoi për ambiciet që ka, si në këtë sezon ashtu edhe në planin afatgjatë me “Djajtë e Kuq”.
Ai pranoi se Manchester United aktualisht nuk është gati për të konkurruar për titullin e kampionit, por sqaroi se ky mbetet qëllimi final dhe se tashmë janë identifikuar hapat konkretë që duhet ndërmarrë drejt këtij suksesi.
“Suksesi do të thotë të fitosh trofe dhe nuk e dimë nëse do ta arrijmë këtë. Nuk jemi ende në një pikë ku mund të themi me siguri se jemi pretendentë për titullin. Na duhet të hedhim hapa të vegjël”.
“Hapat e vegjël do të thonë të përgatitemi për çdo ndeshje si të ishte një finale. Për ne, çdo ndeshje është një finale, në këtë klub presioni është i tillë. Në fund, nuk e di se çfarë do të quhet sukses. Kjo varet nga mënyra si e shikon skuadrën”.
“Ne thjesht duam të jemi vërtet konkurrues, të dominojmë ndeshjet, të shënojmë gola, të mos i mërzisim tifozët kur na shohin duke luajtur. Kemi gjëra të vogla për të përmirësuar dhe kur t’i kontrollojmë një nga një, gjërat do të shkojnë drejt përmirësimit. Kjo është më e rëndësishmja”.
“Mendoj se të gjithë e dinë që kemi një objektiv, jo për këtë sezon, por për të fituar Ligën Premier brenda tre vitesh”.
“Do të ndërmarrim hapat e nevojshëm për të arritur këtë qëllim, por në këtë klub, çdo javë narrativa ndryshon. Duhet të jemi të përgatitur për këtë, të bllokojmë zhurmën, të bëjmë punën dhe të mundohemi të fitojmë ndeshjet”, ka thënë Amorim.
