Trajneri i Manchester United, Ruben Amorim, ka mirëpritur mbështetjen publike që ka marrë së fundmi nga bashkëpronari Sir Jim Ratcliffe, pavarësisht rezultateve të dobëta të skuadrës këtë sezon.
Portugezi deklaroi se e ka ndjerë gjithmonë mbështetjen e drejtuesve të klubit, edhe pas katër humbjeve në tetë ndeshjet e para në të gjitha garat.
Ai zbuloi gjithashtu se personi që i vendos më shumë presion është vetë ai.
“Ai ma thotë gjithë kohën, ndonjëherë me një mesazh pas ndeshjeve, por unë e di dhe Jim e di që futbolli nuk funksionon në atë mënyrë”, u shpreh Amorim.
“Gjithçka që ka rëndësi në futboll është ndeshja e radhës. Nuk mund të kontrollosh ditën tjetër. Por është mirë ta dëgjosh këtë. Sidomos për shkak të kritikave”.
“Omar dhe Jason ma thonë gjithashtu gjithë kohën. Para së gjithash, unë e ndiej këtë mbështetje, nuk është vetëm një deklaratë për publikun, e ndiej çdo ditë”.
Trajneri më pas deklaroi se presioni që vendos vetë mbi veten dhe ekipin është shumë më i madh se çdo presion nga brenda klubit.
Dhe, ndonëse vlerësoi mbështetjen e drejtuesve, theksoi se nuk dëshiron të krijohet përshtypja se ka kohë të mjaftueshme për të përmirësuar gjendjen te United.
“Ndonjëherë, presioni që vendos mbi ekipin dhe veten është shumë më i madh. E di që do të duhet kohë”, tha ai.
“Është mirë ta dëgjosh këtë mbështetje. Mendoj se kjo i ndihmon tifozët tanë të kuptojnë që drejtuesit e dinë se do të duhet kohë”.
“Por, nga ana tjetër, nuk më pëlqen kjo ndjesi, nuk dua që në klub të ndihet sikur kemi kohë për t’i rregulluar gjërat”, përfundoi 40-vjeçari.
